web counter
LEXO PA REKLAMA!

SHKARKO APP

App Store
Google Play

Zgjedhjet e 9 nëntorit/ Celibashi: Do të testojmë përdorimin e IA në numërimin e fletëve të votimit dhe nxjerrjen e rezultateve

17 Tetor 2025, 10:33, Aktualitet CNA

Zgjedhjet e 9 nëntorit/ Celibashi: Do të testojmë përdorimin

Kreu i Komisionit Qendror të Zgjedhjeve, Ilirjan Celibashi, ka marrë pjesë në konferencën rajonale “Mbikëqyrja e Digjitalizimit në Proceset Zgjedhore: Drejt Konvergjencës midis BE-së dhe Ballkanit Perëndimor”.

Celibashi njoftoi gjatë fjalës së tij se në zgjedhjet e pjesshme që do të mbahen në 5 bashki të vendit më 9 nëntor, do të aplikohet edhe përdorimi i Inteligjencës Artificiale. Konkretisht ai tha se do të testohet përdorimi i Inteligjencës Artificiale në numërimin e vlerësimin e fletëve të votimit dhe në nxjerrjen e rezultateve.

"Kemi filluar në versionin eksperimental përdorimin e Inteligjencës Artificiale për të kërkuar informacione zgjedhore si dhe për të ofruar asistencë për administratën zgjedhore, por edhe për subjektet e tjera të përfshira në proces zgjedhor.

Në 9 nëntor zhvillohen zgjedhjet e pjesshme për kryebashkiak në 5 bashki të vendit. Po punohet për të aplikuar për herë të parë përdorimin e Inteligjencës Artificiale në numërimin e vlerësimin e fletëve të votimit dhe në nxjerrjen e rezultateve. Ky do të shërbejë si test dhe nuk do ta zëvendësojë numërimin manual të votave, e cila do të mbetet mënyra zyrtare e referimit për këtë aspekt të procesit zgjedhor.

I gjithë ky proces digjitalizimi i mbështetur edhe nga financimet e partnerëve ndërkombëtare, jo vetëm ka rritur efikasitetin në administrimin e proceseve zgjedhore, por ka konsoliduar edhe reputacionin e KQZ-së si institucion i pavarur", tha Celibashi ndër të tjera. /CNA





Lajmet e fundit nga