Zgjedhjet e 11 majit/ Dumani: Janë 192 materiale që lidhen me dyshime për krime zgjedhore

26 Qershor 2025, 09:55, Aktualitet CNA

Zgjedhjet e 11 majit/ Dumani: Janë 192 materiale që lidhen me dyshime

Kreu i Prokurorisë së Posaçme, Altin Dumani, ishte i pranishëm në tryezën “Reformë gjithëpërfshirëse për integritetin e zgjedhjeve”. Gjatë fjalës së tij, Dumani tha se në total janë 192 materiale që lidhen me dyshimet për krimet zgjedhore, ku janë regjistruar 43 procedime penale.

Nga 43 procedime penale, Dumani bëri me dije se 35 prej tyre janë për korrupsion aktiv në zgjedhje, 4 për korrupsion aktiv dhe pasiv, 1 procedim për përdorim i funksionit publik, 1 për përdorim i funksionit publik dhe shpërdorim detyre, 1 për kanosje ose dhunim të pjesëmarrësve në zgjedhje.

Më tej, kreu i SPAK-ut tha se shumë nga procedimet penale janë ende aktive dhe janë ushtruar kontrolle në banesa dhe zyra.

Dumani vlerësoi bashkëpunimin me institucionet e tjera pjesëmarrëse në Task Forcën e ngritur në kuadër të zgjedhjeve të 11 majit dhe tha se ishte një bashkëpunim produktiv dhe në kohë reale. Gjithashtu kreu i SPAK-ut konstatoi se nevojiten trajtime të prokurorëve të SPAK-ut dhe BKH-së për trajtimin me kujdes të rasteve të krimeve zgjedhore.

“SPAK ka regjistruar 9 procedime penale kryesisht. 192 materiale që lidhen me dyshime për krime zgjedhore. 43 procedime penale për krime zgjedhore. 35 për korrupsion aktiv në zgjedhje, 4 për korrupsion aktiv dhe pasiv, 1 procedim për përdorim të funksionit publik, 1 për përdorim të funksionit publik dhe shpërdorim detyre, 1 për kanosje ose dhunim të pjesëmarrësve në zgjedhje.

Hetimet për shumë nga procedimet penale janë aktive, janë ushtruar kontrolle banese, zyrë. Sfidat nuk janë të pakta. Për çdo problematikë nga subjektet politike apo shoqatat, SPAK-u ka bërë verifikimet përkatëse. Vendimet e mosfillimit, 43, janë produkt i grumbullmit të akteve dhe provave. Nga këto janë ankimuar vetëm 3 vendime mosfillimi, ku gjykata ka lënë në fuqi vendimet e prokurorit të posaçëm.

Doja të theksoja rëndësinë e bashkëpunimit, do ta vlerësoja maksimalisht, shumë produktiv dhe në kohë reale. Nevojitet ndërgjegjësimi publik për mbrojtjen e dëshmitarëve. Është i nevojshëm trajtimi i prokurorëve për të trajtuar me kujdes rastet e krimit zgjedhor. SPAK-u maksimalisht i angazhuar në hetimin e krimit zgjedhor dhe falë bashkëpunimit ne kemi arritur që në një kohë shumë të shpejtë të kryejmë verifikime për çdo rast që na është adresuar.

Ngelemi të përkushtuar në ndjekjen e hetimeve”, tha Dumani./ CNA