Vrasja e ish-policit/ Nëna e Santiago Malkos: Leonard Duka të dënohet me vdekje

19 Janar 2026, 12:34, Aktualitet CNA

Vrasja e ish-policit/ Nëna e Santiago Malkos: Leonard Duka të

Ditën e sotme po zhvillohet seanca gjyqësore në ngarkim të Leonard Dukës, i dyshuar si i përfshirë në vrasjen e ish-policit Santiago Malko. Nëna e ish-oficerit ka kërkuar dënim me vdekje për Dukën, pasi, sipas saj, është ai personi që i ka ekzekutuar djalin.

“Leonard Duka më ka vrarë djalin. Më solli Erlis Dukën dhe Ilir Selmanin e me tha që nuk kam gjë me Santin, por doli e më vrau djalin në mes të rrugës. Unë nuk dua dënim të përjetshëm, dua dënim me vdekje për këtë”, ka thënë ajo.

Nga ana tjetër, Duka ka deklaruar në seancë se është i pafajshëm dhe ka pretenduar se gjithçka është e montuar nga policia.

“Deklaroj që jam i pafajshëm dhe Prokurori nuk ka asnjë fakt kundër meje. Kjo është e montuar nga policia që të më dëmtojnë mua. Kam besim te drejtësia”, raportohet se ka thënë ai.

Edhe avokatja e Dukës është shprehur se nuk ka asnjë provë për përfshirjen e tij në vrasje, ndërsa ka thënë se transkriptet nga Sky Ecc, në legjislacionin shqiptar nuk mund të përdoren si prova, pasi janë të paligjshme.

"Konkluzionet e SPAK-ut nuk janë të bazuara në prova dhe ligj. S'ka asnjë provë, por vetëm deduksione të krijuara nga një proces hetimor jo i plotë dhe i paragjykuar, më shumë të bazuara në histori të raportuara në media. Dëshmitari Blendi Teta ka deklaruar para gjykatës që është kërcënuar dhe vënë në presion nga Policia e Shtetit dhe Ervis Martinaj e këto janë shkelje të rënda të ligjit.

Dëshmia nuk i shërben më të vërtetës, por fabrikim të provës. Dëshmia e Tetës, i cili pretendon në Gjykatë se e ka dhënë në presion nga Ervis Martini, nuk mund të përdoret nga Prokurori në konkluzione përfundimtare. Dëshmia e Blendi Tetës konfirmohet edhe nga ajo e Ilir Selmanit, të bashkëpandehurit tjetër. Duke i bërë ato të besueshme. Edhe Selmani ka thënë para kësaj gjykate se janë dhënë 500 mijë euro për të fundosur vëllezërit Duka.

Prokuroria thotë se shkak për vrasjen është bërë hakmarrja për dy plagosje që dyshohet se ka kryer viktima Santiago Malko, por ato ngjarje janë ende pa autor dhe hetuesit i kanë pezulluar procedimet pasi nuk kanë gjetur autorët. Si mundet prokurori të përcaktoj autorin e atyre ngjarjeve, ndërkohë që personat kompetent që i kanë hetuar nuk i kanë identifikuar.

Transkriptet e Sky Ecc nuk janë prova të ligjshme dhe rezultatet e nxjerra nga to janë të paligjshme sipas legjislacionit shqiptar. Ato hyjnë në cenimin e lirisë dhe fshehtësisë së korrespondencës. Përgjimi i autoriteteve franceze përbën përgjim masiv, nuk ka qenë i orientuar. Identifikimi i bërë nga OPGJ të kodeve, ka qenë amator dhe jo i besueshëm, pasi nuk është ndjekur procedura standarde. Vetë Leonard Duka ka deklaruar para gjykatës se ai nuk ka pasur në përdorim aplikacionin Sky”, është shprehur avokatja.

Prokuroria e Posaçme ngriti akuza kundër Leonard dhe Erlis Dukës, të akuzuar për përfshirje në vrasjen e ish-oficerit Santiago Malko. SPAK-u kërkoi 32 vjet burg për Leonard Dukën dhe 25 vjet për Erlis Dukën. Gjykata e Posaçme pritet të japë vendimin për çështjen më 21 janar, në orën 11:45. /CNA