web counter
LEXO PA REKLAMA!

SHKARKO APP

App Store
Google Play

Vijojnë skenarët/ Burgjet dhe SPAK-u rrëzojnë mediet e Veliajt: Leja nuk u vonua

29 Qershor 2026, 14:38, Aktualitet CNA

Erion Veliaj është shoqëruar sot me një leje 48-orëshe për të shkuar në maternitetin “Koço Gliozheni”. Por, mediat e pushtetit, Rilindja, njerëzit e paguar nga Veliaj, kanë thënë se i është vonuar leja. Këtu “shkëlqen”, kuptohet, gjithmonë Mero Baze.

Njeriu që punësoi fëmijët te Veliaj, njeriu që ka sulmuar SPAK-un dhe drejtësinë për Veliajn, njeriu i Sokol Sadushit, të pavetinguar. Njerëzit që janë bërë miliarderë, multimilionerë në pushtetin e Rilindjes, kanë thënë se i qe vonuar një leje kryetarit të Bashkisë Tiranë.

Ky është një mashtrim i radhës i Mero Bazes dhe të tijve, përfshi bandën tjetër në 99-çave, është një gënjeshtër. Dhe këtë e thekson në mënyrë zyrtare Drejtoria e Përgjithshme e Burgjeve. CNA kontaktoi zyrtarisht Drejtorinë e Burgjeve për ta pyetur se cila qe arsyeja që është vonuar dhe pse nuk është dhënë leja nga SPAK-u. Në fakt, një burim zyrtar nga Drejtoria e Përgjithshme e Burgjeve tha se sot është njoftuar Drejtoria e Burgjeve duke i dhënë certifikatën e lindjes së fëmijës. Sipas ligjit, pa u çuar certifikata e lindjes së fëmijës te Drejtoria e Përgjithshme e Burgjeve, nuk fillojnë procedurat për të marrë leje i burgosuri përkatës.

Ka një procedurë të mirësqaruar ligjore, e cila thekson se kur jepet leja në të tilla raste. Dhe që Drejtoria e Burgjeve të aktivizohej, duhej që të vinte certifikata e lindjes. Në rastin konkret, ka qenë një lindje e planifikuar dhe certifikata ka shkuar vetëm sot.

Sapo certifikata ka shkuar, SPAK ka dhënë lejen në mënyrë të rrufeshme. Si rrallëherë, pa shumë burokraci dhe pa e çuar letra këtej apo andej, menjëherë me dorëzimin e certifikatës së lindjes së fëmijës nga Ajola Xoxa, Drejtoria e Burgjeve ka komunikuar me SPAK-un dhe kryetari i Bashkisë së Tiranës është shoqëruar për në maternitetin “Koço Gliozheni”.

 

Çfarë ka ndodhur dhe kush mashtron?

 

Siç theksuam më lart, edhe në këtë rast mashtrimet nuk do t’u shmangeshin shkrimeve nga mediat mercenare të pushtetit, të paguara nga koncesionet, aferat, të sponsorizuara nga fondet që qarkullojnë nëpërmjet Arbër Veliajt, vëllait të kryebashkiakut të Tiranës, Erion Veliaj. U tha se ishte vonuar leja nga SPAK-u.

Në fakt, SPAK-u, sipas verifikimit të bërë dhe të konfirmuar zyrtarisht nga burgjet, e ka dhënë lejen në mënyrën më të shpejtë të mundshme. Thuajse të rrufeshme. Menjëherë sapo përfaqësuesit ligjorë të Erion Veliajt kanë çuar certifikatën e lindjes së fëmijës në Drejtorinë e Përgjithshme të Burgjeve, është komunikuar me SPAK-un dhe SPAK-u ka dhënë leje.

Vijojnë skenarët/ Burgjet dhe SPAK-u rrëzojnë mediet e
Drejtoria e Përgjithshme e Burgjeve

CNA i është drejtuar edhe SPAK-ut për ta pyetur zyrtarisht pse ka zgjatur procedura e dhënies së lejes së kryebashkiakut Veliaj. Përgjigja zyrtare ka qenë, që nuk ka pasur asnjë vonesë. Sot në mëngjes Drejtoria e Burgjeve ka kërkuar që t’i jepet një leje kryebashkiakut të Tiranës, pasi bashkëshortja e tij ka lindur. Kjo e shoqëruar edhe me certifikatën përkatëse. Menjëherë prokurori i çështjes, Ols Dado, ka bërë vendimin.



Gjithashtu CNA ka mësuar se përfaqësuesit ligjorë të Erion Veliajt për të krijuar gënjeshtrën me mediat e pushtetit, ditën e premte, pasdite, mbas orarit zyrtar dhe pa pasur një certifikatë lindjeje të fëmijës, siç e kërkon ligji, kanë bërë një kërkesë në SPAK. Por, prokurori Ols Dado, sipas burimeve zyrtare nga SPAK-u, nuk ka qenë në Tiranë. Ashtu edhe prokurori tjetër i çështjes, ish-drejtuesi i SPAK-ut, Altin Dumani, ndodhej jashtë shtetit. Dhe kjo është lehtësisht e verifikueshme nga TIMS.

Në rast se prokurorët do të ishin,  mund të anashkalonin procedurën e certifikatave, por ndodheshin jashtë shtetit. Menjëherë sapo janë paraqitur ditën e hënë në punë, sapo janë njoftuar nga Drejtoria e Burgjeve për çuarjen e certifikatës së fëmijës dhe faktin që është bërë një kërkesë, Erion Veliaj menjëherë është shoqëruar në mënyrë urgjente te bashkëshortja e tij dhe për të takuar fëmijën e tij.

Pra, një mashtrim i ngritur, ndërkohë që rrethanat dhe faktet e dhëna zyrtarisht edhe nga Drejtoria e Burgjeve, edhe nga SPAK-u, rrëzojnë skenarët që ndërtohen me mashtrime publike, për t’i përdorur më pas në studio lobimi në SHBA apo nëpër gjykata, për të kërkuar lirimin e kryebashkiakut të Tiranës me 13 akuza të rënda penale, i cili qëndron në burgun e Durrësit prej më shumë se një viti.

Dhe prej korrikut të vitit të shkuar dosja e parë hetimore është mbyllur dhe është çuar për gjykim, ndërkohë që seancat shtyhen pambarimisht për shkak të skemave dhe skenarëve që përdor Erion Veliaj, si në rastin konkret kur edhe pse merret dhe shoqërohet në mënyrë të rrufeshme për të parë fëmijën e tij të sapolindur dhe bashkëshorten e tij, mediat mashtrojnë dhe na thonë se është vonuar leja, kur në fakt leja është kërkuar sot në mëngjes nga Burgjet dhe është dhënë në mënyrë të menjëhershme./CNA

 





Lajmet e fundit nga