Turizmi/ Rama: Shqipëria vazhdon me ritme të larta, publikon shifrat për muajin mars

2 Maj 2024, 15:46, Aktualitet CNA

Turizmi/ Rama: Shqipëria vazhdon me ritme të larta, publikon shifrat

Kryeministri Edi Rama

Ditën e sotme, kryeministri Edi Rama ka publikuar klasifikimet ndërkombëtare për muajin mars sa i përket rritjes së numrit të pasagjerëve nga ajri krahasuar me vitin 2019 para pandemisë.

Shqipëria vazhdon të mbajë ritmet më të larta me 233.3%, ku sipas kryeministrit shënon një sukses të vazhdueshëm për vendin.

Ndërkohë që shqiptarët kontribuojnë në mbushjen e avionëve, shifrat e rritjes së numrit të turistëve të huaj që vizitojnë Shqipërinë po tregojnë një trend pozitiv në sektorin turistik.

Rritja e dhënies së apartamenteve me qira për të huajt dhe rritja e kërkesave për hotele janë disa prej indikatorëve që e konfirmojnë këtë zhvillim pozitiv, shtoi kryeministri Edi Rama.

Sipas kryeministrit, përfitimet nga turistët shkojnë përtej qejfit personal dhe ndikojnë në rritjen e aktivitetit ekonomik të vendit.

Kjo rritje e aktivitetit ekonomik është e lidhur ngushtë me rritjen e të ardhurave për shtetin, të cilat janë investuar në rritjen e pagave dhe investimeve.

"NGA LART AKOMA MË LART

Ja edhe klasifikimi ndërkombëtar i marsit për rritjen e numrit të pasagjerëve nga ajri krahasuar me numrat e vitit 2019 (para pandemisë), ku rritja e Shqipërisë vazhdon me ritmet më të larta.

Dhe e para, ata që thonë se janë shqiptarët që i mbushin avionët jo turistët, nuk duhet të harrojnë se edhe sikur të jetë kështu, ky është një lajm fantastik, sepse do të thotë që kanë shumë më tepër dëshirë të vijnë në Shqipëri, ndërkohë edhe çmimet e biletave janë ulur ndjeshëm falë shtimit të linjave ajrore. Por nuk është tamam kështu, sepse shifrat e të huajve që vijnë në Shqipëri flasin vetë, siç flet rritja marrëmendëse e dhënies së apartamenteve me qera për të huajt apo kërkesave për hotele.

E dyta, ata që thonë se s’na duhen turistët se ata vijnë për qejf, ne duam këtë e atë, nuk duhet ta harrojnë se qejfi i turistëve kushton dhe fitimet nga shpenzimet e tyre për qejf i marrin shqiptarët që punojnë, prodhojnë, shesin, shërbejnë e me radhë, ndërkohë që pjesa e të ardhura për shtetin nga rritja e aktivitetit ekonomik, investohet për të rritur pagat e investimet.

E fundit, kjo është arritje e Shqipërisë dhe gjithë këta që vijnë duke u shtuar i bëjnë jehonë pozitive vendit tonë, kur kthehen në vendet e tyre, prandaj kush s’e do qeverinë le ta shajë sa të dojë, po nuk ka pse të mos gëzohet për Shqipërinë kur e vërteta flet kaq qartë si në këtë rast", shkruan Rama./ CNA

Turizmi/ Rama: Shqipëria vazhdon me ritme të larta, publikon shifrat