Transmetimet live të seancave në media rrezikojnë jetën e dëshmitarëve dhe bashkëpunëtorëve të drejtësisë

27 Prill 2026, 12:15, Aktualitet CNA

Transmetimet live të seancave në media rrezikojnë jetën e

Ilir Meta, seanca ne GJKKO

Ilir Meta ka kërkuar në mënyrë të përsëritur që gjyqi i tij në GJKKO, seancat gjyqësore të jenë live, të jepen në media.

Të njëjtën linjë ka filluar të mbajë edhe Erion Veliaj, i cili, nëpërmjet avokatëve të tij, duket se ndjek hap pas hapi Ilir Metën.

Në fakt, gjyqet live janë si ato të kohës së Enverit në kinema ku mblidhej populli, ndërsa tani ka sinjal dhe mund ta shohësh rehat nga shtëpia.

Seancat gjyqësore direkt në media (live) kanë një problematikë të thelluar që shumë gjykata ndërkombëtare i kanë dhënë një standard mjaft të rëndësishëm duke ndaluar transmetimin e tyre.

Së pari, fakti që jo çdo dëshmitar mund të flasë njësoj në një seancë gjyqësore apo duke pasur vëmendjen e kamerave duke e ditur se po e shikon gjithë vendi.

Së dyti, bashkëpunëtorët e drejtësisë dekonspirohen në seancat live.

Kjo është e qartë dhe e provuar.

Cili nga dëshmitarët që është bashkëpunëtor me drejtësinë me kamerat përballë, me mediat që buçasin dhe ulërasin, me presionin e vazhdueshëm që do të vijë nga gazeta, portale e televizione të lidhura me interesat e Ilir Metës, Erion Veliajt, apo çdo të pandehuri tjetër, do ta përballonte psikologjikisht?

Së treti, solemniteti gjyqësor mund të shkatërrohet dhe seancat të përdoren për show politik.

Ndaj dhe seancat nuk zhvillohen me dyer të mbyllura, janë të hapura, kanë prezencën e gazetarëve që e ndjekin në sallë, kanë prezencën e kamerave në një segment të caktuar të hapjes së seancës gjyqësore që kamerat të bëjnë plane dhe më pas largohen dhe zhvillohet gjyqi pa transmetim direkt në media.

Kështu ndodh në Europë, kudo.

Nuk ka gjyqe live me kamera sepse rrezikohen dëshmitarët, bashkëpunëtorët e drejtësisë dhe transmetimi live mund të rrezikojë edhe çështjen gjyqësore, qëndrimet, duke ditur standardin e sigurisë që ka, në mënyrë të veçantë në Shqipëri.

Prandaj shumica e vendeve europiane, pa folur këtu edhe për SHBA-në, seancat gjyqësore zhvillohen me gazetarë pa praninë e kamerave dhe më pas në dalje të seancës avokatët mbajnë qëndrime siç ndodh rëndom në Shqipëri, ku tashmë daljet e mbrojtësve para dyerve të SPAK-ut apo GJKKO-së janë kthyer në një “show” të përditshëm.

Seanca me kamera live dhe dyer të hapura me zhurmë nuk sjellin asgjë tjetër veçse intimidimin e dëshmitarëve dhe presionin, shantazhin mbi bashkëpunëtorët e drejtësisë, pse jo dhe mbi gjykatën e vetë prokurorët./ CNA