Rritja e çmimit të naftës/ Rama: Po krijojmë një faktor shtetëror që do të luajë rolin e stabilizuesit

15 Mars 2026, 10:43, Aktualitet CNA

Kryeministri Edi Rama ka komentuar rritjen e çmimeve të naftës, duke e lidhur atë me ndikimin e luftës së SHBA-së dhe Izraelit kundër regjimit të Teheranit, që ka shkaktuar ndërprerje në zinxhirin global të furnizimit, veçanërisht në ngushticën e Hormuzit.

Ai theksoi se rritja e çmimit është e pashmangshme në tregjet ndërkombëtare, por qeveria po ndërmerr masa për të mbrojtur tregun e brendshëm.

Po krijohet një faktor shtetëror që do të luajë rolin e stabilizuesit të çmimit, do të rrisë transparencën dhe do të garantojë furnizimin, me mbështetje nga garancia sovrane.

Paralelisht, Ministria e Ekonomisë dhe Ministria e Financave kanë ngritur një task forcë të përbashkët, e cila do të monitorojë tregun e hidrokarbureve, do të parandalojë abuzimet me çmimet e karburanteve dhe do të analizojë ndikimin mbi rritjen e çmimeve të ushqimeve.

Gjithashtu, projektligji për rezervat strategjike të naftës është në konsultim publik dhe parashikon krijimin e rezervave për periudha 1–3 mujore, me qëllim që qytetarët të ndjejnë efektet e stabilizimit të tregut në pak muaj.

Kryeministri Rama e cilësoi këtë hap si një moment kthese për garantimin e çmimeve të qëndrueshme të naftës në Shqipëri, duke shmangur ndikimet e luhatjeve globale.

“Shënimi i parë lidhet pashmangshmërisht me impaktin e luftës së SHBA dhe Izraelit, të cilën ne e mbështesim plotësisht kundër makinerisë së regjimit kriminal të Teheranit, mbi çmimin e naftës.

Kjo është një rritje e pashmangshme në të gjitha tregjet botërore dhe po ndodh në të gjithë botën pikërisht si pasojë e këputjes së zinxhirit të vlerës që qarkullon në shkëmbimet tregtare në një pikë strategjike siç është ngushtica e Hormuzit.

Gjithsesi nga ana tjetër, ne nuk do të rrimë duarkryq përballë kësaj situate dhe siç e kam deklaruar në fakt kohë më parë, jemi sot edhe për shkak të kushteve të kësaj krize të papritur në momentin kur do finalizojmë krijimin e një faktori shtetëror me impakt në tregun e brendshëm të naftës, i cili do të luajë rolin e stabilizuesit të tregut, do të ndikojë në rritjen e transparencës së çmimit, si dhe do të garantojë furnizimin në treg, duke pasur në mbështetje një kapacitet shumë të rëndësishëm siç është garancia sovrane.

Pra, besoj shumë se ky do të jetë një moment kthese për të përmbushur edhe një tjetër ambicie dhe zotim të marrë menjëherë me nisjen e mandatit të katërt, që nafta që tregtohet në Shqipëri, të jetë një produkt në një nivel të pandikuar kaq fort nga luhatjet në tregjet ndërkombëtare dhe kjo është plotësisht e mundur.

Paralelisht, Ministrja e Ekonomisë ka ngritur një task forcë të përbashkët me Ministrin e Financave, duke vënë në veprim administratën tatimore dhe doganore, nga njëra anë, me qëllim rritjen e kontrollit në tregun e hidrokarbureve dhe parandalimin e çdo rritje abuzive të çmimeve të karburanteve dhe nga ana tjetër për të studiuar me shpejtësi edhe një ndikim mbi fenomenin abuziv të rritjes së çmimit të ushqimeve.

Ky grup propocional do të fokusohet me një plan të detajuar në gjithë zinxhirin e tregtimit të karburanteve, si në shumicë, ashtu dhe në pakicë, ndërsa çmimet do jenë nën monitorim të vazhdueshëm nga institucionet përkatëse.

Po ashtu, projektligji për rezervat strategjike të naftës është tashmë në konsultim publik. Përkon me këtë situatë, por është një nismë e ndërmarrë kohë përpara krijimit të kësaj situate.

Parashikon një krijim rezervash që shtrihet nga një në tre muaj, të naftës, por e thashë dhe më parë, ambicia jonë shkon përtej kësaj dhe besoj se në pak muaj, qytetarët do të mund të prekin fillimin e një ndryshimi të shumëpritur në tregun e karburanteve”, tha Rama./ CNA