Programet prioritare/ 109 studentë mund të përfitojnë bursa në Universitetin Fan Noli në Korçë

6 Shkurt 2024, 11:39, Aktualitet CNA

Programet prioritare/ 109 studentë mund të përfitojnë bursa

Vendimi i marrë nga qeveria lidhur me bursën 40 mijë lekë për studentët të cilët do të zgjedhin programet prioritare në universitete, është zbatuar edhe në Universitetin Fan Noli të Korçës. Kriteri kryesor i përfitimit të kësaj burse është mesatarja mbi 8.5, ndërsa programet prioritare janë degët e bujqësisë, turizmit, shkencave sociale dhe ato shkencore. Sa i përket këtij vendimi, zëvendësrektori i Universitetit të Korçës, Artur Adili ka treguar se në aplikimet e bëra nga studentët, vetëm 109 prej tyre janë pranuar për të përfituar bursën.

"Universiteti i Korçës ka 11 programe prioritare, tek të cilat janë regjistruar rreth 150 studentë. Bëhet fjalë për programet prioritare si Gjuhë-Letërsi, Matematikë-Fizikë, të gjitha programet bachelor të fakultetit të bujqësisë dhe turizëm - mikpritje. Nga numri total i studentëve që kanë aplikuar, janë shqyrtuar 109 aplikime ndërsa të tjerë janë skualifikuar për shkak të mosplotësimit të kritereve, kryesisht mesatares. Kuotat që ka caktuar agjencia kombëtare e financimit të arsimit të lartë për universitetin Fan Noli, janë 24, dhe është një numër relativisht i madh krahasuar me universitetet e rajoneve të tjera", ka thënë zv.rektori Artur Adili.

Më tej, Adili shton se Universiteti i Korçës është me një numër të madh kuotash krahasuar me universitetet e tjera.

"Kuotat që ka caktuar agjencia kombëtare e financimit të arsimit të lartë për Universitetin Fan Noli, janë 24, dhe është një numër relativisht i madh krahasuar me universitetet e rajoneve të tjera. Universiteti i Tiranës ka 25 kuota, ndërsa Korça 24 kuota. Shpërndarja e kuotave është bërë nga senati akademik duke pasur kriter kryesor mesataren, të parët që kanë përfituar janë ata me mesatare mbi 8.5, ndërsa pjesa tjetër që mbeti jashtë kësaj mesatare është ndarë në mënyrë profesionale mes fakulteteve", shprehet ai.

Sa u përket studentëve të cilët aplikuan, por nuk mund ta përfitonin bursën, ata do të paguajnë tarifën e regjistrimit prej 20 mijë lekësh. Reagimi kundërshtues duket se ka qenë shumë i ulët, ndërsa nuk ka pasur largime apo çrregjistrime të studentëve të cilët nuk përfituan bursë.

"Një nga programet që ka përfituar më shumë është ajo e Bio-Kimisë ku aplikantët kanë qenë me mesatare mbi 9. Për studentët që aplikuan por nuk mundën të përfitonin bursë për shkak të mosplotësimit të kritereve, ata do të paguajnë tarifën e regjistrimit prej 20 mijë lekësh (të rinj)", tha ai./ CNA