Procedurat/ Pagesa e taksës vjetore të mjeteve të përdorura dhe luksit nga sot në e-Albania

30 Shtator 2025, 13:27, Aktualitet CNA

Procedurat/ Pagesa e taksës vjetore të mjeteve të përdorura

Përdoruesit e mjeteve nga sot pagesën e taksës vjetore do ta paguajnë online përmes e-Albania.

Shërbimi elektronik mundëson publikimin dhe pagesën online të Taksës Vjetore të Mjeteve të Përdorura (TVMP) dhe të mjeteve të luksit në zotërim të qytetarëve dhe bizneseve.

Për këtë shërbim nuk nevojitet dokumentacion shoqërues. Procedura do të kryhet duke zgjedhur në e-Albania shërbimin “Pagesa e taksës vjetore të mjeteve të përdoruara/ mjeteve të luksit”. Pagesa do të kryhet në aplikacion bankar të shkarkuar në telefon. Për të shkarkuar pullën e taksës do të klikohet në butonin “Shkarko Pullën e Taksës”. Pulla do të dërgohet te rubrika “Dokumentet e mia” në llogarinë tuaj në portalin e-Albania.

Nga ofrimi i këtij shërbimi kryeministri Edi Rama njoftoi se qytetarët do të kursejnë 57,9 mln lekë, 11,501 ditë pune dhe 4,7 mln km rrugë të përshkruara.

Procedura në e-Albania për pagesën e taksës vjetore të mjeteve të përdoruara/ mjeteve të luksit

Ky shërbim elektronik mundëson publikimin dhe pagesën online të taksave të automjeteve në zotërim të qytetarëve dhe bizneseve bazuar në Ligjin nr. 9975, datë 28.07.2008, “Për taksat kombëtare”, i ndryshuar.

Dokumentacioni i nevojshëm

Për këtë shërbim nuk nevojitet dokumentacion shoqërues

Hapat e procedurës:

– Identifikohuni si qytetar ose biznes në portalin e-Albania; – Zgjidhni shërbimin “Pagesa e taksës vjetore të mjeteve të përdoruara/ mjeteve të luksit”;

– Klikoni butonin “Përdor” për të parë automjetet që dispononi dhe zgjidhni mjetin për të cilin dëshironi të shikoni taksat përkatëse duke klikuar butonin “Zgjidh”;

– Në raste se keni taksa të papaguara, zgjidhni vitin përkatës dhe klikoni butonin “Llogarit” për të parë vlerën e tyre; – Klikoni opsionin “Paguaj” në mënyrë që të vijoni me mënyrën e pagesës përmes kanalit bankar dhe në hapat e ardhshëm zgjidhni bankën nga e cila do të bëni pagesën. (Aktualisht është e ndërlidhur Banka Kombëtare Tregtare);

-Vijoni me ndjekjen e udhëzimeve deri në finalizimin e urdhërpagesës;

-Më pas duhet të vijoni me kryerjen e pagesës në aplikacionin bankar të shkarkuar në telefonin tuaj; Urdhërpagesa është e vlefshme për t’u paguar deri në orën 24:00 të së njëjtës ditë.; – Për të shkarkuar pullën e taksës, klikoni butonin “Shkarko Pullën e Taksës”. Pulla do të dërgohet te rubrika “Dokumentet e mia” në llogarinë tuaj në portalin e-Albania. Kujdes: Vetëm në rastin e pagesës së taksës për vitin aktual do të shkarkohet “Pulla e taksës vjetore të mjeteve të përdoruara/ mjeteve të luksit”. Shënim: Në rastin kur shërbimi shfaq: “Nuk ka të dhëna!”, arsyet e mos shfaqjes së të dhënave janë:

Nuk ka automjete të regjistruara në pronësi të qytetarit ose biznesit;

Ekzistojnë raste kur ka automjete të regjistruara në pronësi të qytetarit ose biznesit, por në të dhënat e pronarit nuk është i regjistruar Numri i Identifikimit të tij (NID);

– Nuk keni kryer proçedurën e ndërrimit të pronësisë referuar një dokumenti të fitimit të pronësisë. Në këto raste, lutemi që të drejtoheni pranë Drejtorive Rajonale të Shërbimeve të Transportit Rrugor për plotësimin e të dhënave tuaja në regjistrin elektronik të DPSHTRR-së.

Koha e nevojshme e marrjes së shërbimi është e menjëhershme.

Periudha e vlefshmërisë është 1-vjeçare/Monitor