Përfundon raundi i dytë i aplikimeve/ Gjuraj: 2088 aplikime, presim raundin e tretë dhe fazat shtesë

30 Shtator 2025, 12:35, Aktualitet CNA

Përfundon raundi i dytë i aplikimeve/ Gjuraj: 2088 aplikime, presim

Sot ka përfunduar raundi i dytë i aplikimeve në universitete. Rektori i universitetit të Shkodrës, Tonin Gjuraj, bëri të ditur se edhe në raundin e dytë numri i studentëve që kanë aplikuar në këtë universitet për vitin e ri akademik është thuajse i njëjtë me atë të vitit të kaluar, me një rritje të papërfillshme prej 15 aplikimesh më shumë.

“Kanë përfunduar aplikimet për raundin e dytë në universitete që do pasohet më pas me regjistrimet. Sa u takon aplikimeve, në raundin e dytë kemi 2088 aplikime nga 2073 që kanë qenë vitin e kaluar, pra një rritje shumë e lehtë dhe se sa do të përkthehen në regjistrime do ta shohim që nga dje që ka nisur regjistrimi deri më 8 tetor. Kemi edhe një raund të tretë që do jetë mes 13 dhe 24 tetor, por me kushtin që aplikantët të jenë të regjistruar në portalin U-Albania. Nëse marrim parasysh aplikimet, studentët që vijnë nga trojet, transferimet dhe programet e dyta, bilancin përfundimtar do ta bëjmë me 24 tetor. Cikli i dytë i studimeve ka nisur aplikimin dhe përfundon me 3 tetor dhe deri më 17 tetor do kemi shpalljen e fituesve dhe pastaj mes datës 17 dhe 27 tetor do kemi numrin real të studentëve të ciklit të dytë, pra master shkencor dhe profesional. Datat 24 dhe 27 tetor do të na japin panoramën e qartë te numrit të studentëve që do jenë këtë vit në universitetin e Shkodrës. Programet e ciklit të tretë janë një tjetër histori sepse kuotat janë të limituara dhe kemi dy programe në gjuhësi dhe ekonomi dhe turizëm i qëndrueshëm. Me 6 tetor universiteti hap dyert dhe në Shkodër do jetë e pranishme ministrja e Arsimit Mirela Kumbaro, ndërsa me 16 tetor kemi ceremoninë e diplomimit për vitin 2024-2025”, tha rektori i Universitetit të Shkodrës, Gjuraj.

Rektori Gjuraj u ndal te nevoja për investime në universitetin e Shkodrës duke i bërë sërish apel pushtetit vendor, por edhe qeverisë shqiptare për rikonstruksion godinash aktuale dhe kalimin në pronësi të dy godinave të vjetra që prej vitesh janë jashtë përdorimit.

“Do vijojmë dialogun me pushtetin vendor sepse është një hapësirë e ligjit që pushteti lokal vë në dispozicion 10% të buxhetit për universitetin. Kemi bërë përpjekje që pushteti vendor të kontribuojë në disa rikonstruksione godinash ku e kemi të pamundur të përdorim buxhetin tonë. Ka pasur edhe kërkesa të tjera për zgjerim hapësirash në universitet me dy godina që në fakt inistoj dhe do t’ia bëj të ditur edhe ministres për godinën pranë Fakultetit të Shkencave të Edukimit ose godina e ish-Sanatoriumit ose ish-spitalit psikiatrik. Pastaj nëse qeveria mendon një projekt shumë të madh për Shkodrën kjo mbetet për t’u parë sepse nuk është në dorën tonë”, tha rektori.

Këto qëndrime rektori Gjuraj i mbajti përpara fillimit të mbledhjes së senatit akademik të universitetit “Luigj Gurakuqi”./CNA