E fundit!

09:34 Aktualitet

Apel për kujdes nga temperaturat e larta/ Rrezik për të moshuarit dhe fëmijët

Temperaturat e larta që po përfshijnë vendin po rrisin rre...

KPA shkarkon përfundimisht prokurorin e Tiranës, Ardian Braho

25 Prill 2024, 18:01, Aktualitet CNA

Kolegji i Posaçëm i Apelimit vendosi sot lënien në fuqi të vendimit të të Komisionit të Pavarur të Kualifikimit, për shkakrimin përfundimtar të Ardian Brahos, prokurorin e Prokurorisë së Tiranës.

Trupa gjykuese që shqyrtoi ankimimin e prokurorit në Kolegjin e Posaçëm të Apelimit përbëhej nga Rezarta Schuetz kryesuese, Natasha Mulaj relatore, Albana Shtylla, Ina Rama, Sokol Çomo anëtarë

Më 1 nëntor 2021, prokurori Ardian Braho është shkarkuar nga Komisioni i Pavarur i Kualifikimit.

Ardian Braho, është prokurori që i mbijetoi akuzës për korrupsion.

Në vitin 2016, Ardian Braho, u bë kryefjalë e të gjitha mediave, pas transmetimit të një videoje ne emisionin “Stop”, ku një qytetar nëpërmjet një oficeri gjyqësor arrin jep ryshfet shumën prej 18 mijë euro për prokurorin Braho.

Por ky i fundit deklaroi në atë kohë, se nuk kishte lidhje me 18 mijë euro dhe se emri i tij është përdorur nga oficeri.

Braho ka qenë prokuror i disa çështjeve të rëndësishme në Tiranë, ndër të tjera ka hetuar dosjen e Lulzim Bashës, për sheshin “Skënderbej”, dosje e cila u pushua, me argumentin se vendimi ishte marrë nga Këshilli Bashkiak i Tiranës.

Një rast që ai ka hetuar dhe e ka pushuar është edhe çështja e Haki Çakos, i cili u akuzua për përdorimin e pajisjes së përgjimit, pa marrë leje nga autoritetet.

Ndër të tjera, Braho ka pasur në duar edhe çështjen e një çimke përgjuese në zyrën e sekretares së Ministrit të Brendshëm, Saimir Tahiri apo edhe çështjen hetimore ndaj ish-kreut të Inspektoratit Ndërtimor të Tiranës, Florenc Hoxha, për shpërdorim detyre dhe prishje të ndërtesave në kundërshtim me ligjin.

Sa i përket pasurisë, Braho rezulton se të ardhurat i ka nga paga e tij dhe e bashkëshortes. Nuk shquhet për ndonjë patundshmëri, maksimumi që ka shpenzuar është 12.000 euro për blerjen e një makinë, ku 5.000 euro i ka marrë borxh./ CNA