web counter
LEXO PA REKLAMA!

SHKARKO APP

App Store
Google Play

GJKKO pezullon afatet e paraburgimit për Veliajn/ Rëndohen pozitat për kryebashkiakun

24 Mars 2026, 16:48, Aktualitet CNA

Seanca e dytë në themel ndaj kryebashkiakut të Tiranës, Erion Veliaj, është shtyrë sërish nga GJKKO, këtë herë për shkak të mungesës së avokatit të një prej të pandehurve në proces.

Në të njëjtën kohë, gjykata ka marrë një vendim të rëndësishëm procedural, pezullimin e afateve të paraburgimit për Veliajn dhe të pandehurit e tjerë që ndodhen në masën “arrest në shtëpi”. Ky vendim nënkupton se periudha e qëndrimit në këto masa sigurie nuk do të llogaritet përkohësisht, duke zgjatur në praktikë kohën reale të izolimit.

Vendimi vjen në një kohë kur Veliaj përmes formave të ndryshme procedurale ka zvarritur procesin në mënyrë të përsëritur, çka ka penguar vijimin normal të shqyrtimit në themel të çështjes.

Me pezullimin e afateve, gjykata synon të shmangë zvarritjen e mëtejshme të procesit dhe të garantojë zhvillimin e tij pa pengesa procedurale, ndërsa ky vendim pritet të ketë ndikim të drejtpërdrejtë në kohëzgjatjen e qëndrimit të të pandehurve në masat e sigurisë.

Kështu, për shkak të zvarritjeve të seancave pa justifikim, Veliaj ka humbur të drejtën e përfitimit të paraburgimit, ku sipas ligjit 1 vit burg i llogaritej si 1.5 vite. Me vendimin e ri të dhëna nga GJKKO, 1 vit burg do t'i llogaritet saktësisht 1 vit, pa asnjë shtesë përfitimi.

Ky rregull prek si Erion Veliajn, ashtu edhe Ermal Abulen, i cili ndodhet në arrest shtëpie.

Ndërkaq shtyrja e seancës për në 1 prill këtë të martë erdhi pasi i pandehuri Meriman Palushi u paraqit pa përfaqësim ligjor. Ndërkohë, gjykata pranoi kërkesën e Veliajt për të caktuar si avokat mbrojtës ish-deputetin Plarent Ndreca, i cili u legjitimua pavarësisht se është vetë nën hetim nga SPAK për shkelje të barazisë në tendera.

Veliaj ndodhet në paraburgim që prej 10 shkurtit 2025, ndërsa ndaj tij rëndojnë 13 akuza për 5 vepra të rënda penale, përfshirë korrupsionin pasiv, pastrimin e parave dhe shpërdorimin e detyrës. /CNA





Lajmet e fundit nga