E Diela e Tretë e Llukait/ Kryepiskopi Joan: Nëse vdesim shpirtërisht, ngjallja trupërisht nuk ka vlerë

19 Tetor 2025, 10:19, Aktualitet CNA

Shërbesa e Mëngjesores dhe Liturgjia Hyjnore e të Dielës së Tretë të Llukanit është mbajtur sot në Kishën e Ungjillëzimit në Tiranë nën drejtimin e Fortlumturisë së Tij Kryepiskopit Joan.

Kryepiskopi gjatë fjalës së tij dha mesazhe të forta për besimtarët, ku theksoi se vetëm me besimin te Zoti mund të mundim frikërat tona.

Fortlumturia e tij foli dhe për ngjalljen, ku tha se nëse një person vdes shpirtërisht dhe ngjallet trupërisht, kjo ngjallje nuk ka vlerë. Kryepiskopi shtoi se Jezu Krishti shembi murin mes vdekjes dhe jetës.

"Ne e duam Perëndinë kur e provojmë realisht Perëndinë e tij. Nëse ne do të jemi të ndërgjegjshëm se nga çfarë na ka shpëtuar Zoti ynë Jezu Krisht do të fillojmë ta duam realisht atë. Jeta shpirtërore duhet përjetuar, nuk mund të jetë vetëm intelektuale duke lexuar libra. Zoti është zemërdhembshur, u thërret të gjithëve.

Më pyesin shumë njerëz çfarë bën Kisha për këto njerëz në nevojë dhe ju përgjigjem po t'i çfarë ke bërë për këtë njeri. Çdo i krishterë është thirrur të ndhmojë njerëzit që ka afër. Dashuria e vërtetë nuk do të thotë të na vijë keq për dikë por të bëjmë një veprim. Vijmë në pikën e dytë në ngjalljen. Thirrja dhe ngjallja ishte në emrin e Jezu Krishtit. Vetëm fuqia e perëndisë mund të ngrejë dhe ta ngjallë atë.

Kur i thotë Zoti vejushës mos qaj, i thotë mos të kalojë në dëshpërim. Ka lot por ka dhe lot të tjerë. Disa mund të qajnë nga dëshpërimi por dhe nga kuptimi i thellë i diçkaje ose dashuria për të tjerët. Vdekja nuk është fundi ynë. Krishti e prishi murin që ndante jetën nga vdekja. Tek zoti nuk ka të vdekur. Të gjithë janë të gjallë. Edhe sikur të ngjallemi trupërisht dhe kemi vdekur shpirtërisht, ngjallja nuk ka asnjë dobi.

Ndërsa trupi ynë një ditë do vdesi, shpirti do të jetë gjithmonë. Nëse një njeri nuk beson te ngjallja, gjithë tjetra është e kotë. Krishti solli këtë të re, mundjen e vdekjes. Nëse ne do kemi shpresën e ngjalljes nuk do tna trembi vdekja. Çdo fjalë e Ungjillit është një fjalë jete.

Frika e Perëndisë është një respekt karshi zotit. Nëse kemi frikë Perëndinë, nuk do kemi frikë njerëzit. Nëse do kemi në shpirt frikën e Perëndisë, do mbushemi në shpirt me lavdi ndaj Perëndisë.", u shpreh Fortlumturia e Tij, Kryepiskopi Joan. /CNA