web counter
LEXO PA REKLAMA!

SHKARKO APP

App Store
Google Play

E fundit!

x

e-Albania si “Ngushtica e Hormuzit”/ Bizneset raportojnë bllokim të punës

19 Maj 2026, 16:28, Aktualitet CNA

Portali qeveritar e-Albania po vijon të shfaqë probleme në funksionim, duke krijuar vështirësi serioze për bizneset dhe kontabilistët në kryerjen e procedurave të përditshme.

Përfaqësues të biznesit kanë deklaruar për Monitor se, platforma herë funksionon normalisht dhe herë del jashtë shërbimit, duke penguar aksesin në shërbime kyçe si shkarkimi i faturave të fiskalizuara dhe ndërveprimi me sistemet financiare shtetërore.

“Edhe sot nuk logohesh në e-Albania dhe as në SelfCare”, shprehen bizneset, duke theksuar se situata po u bllokon aktivitetin dhe po sjell vonesa në procese të rëndësishme administrative.

Një nga problemet më të mëdha lidhet me mosfunksionimin e sistemit të fiskalizimit, ku përdoruesit nuk arrijnë të shkarkojnë faturat përmes lidhjes me platformën SelfCare, duke penguar mbylljen e veprimeve financiare.

Sipas Monitor, gjendja e paqëndrueshme e sistemit është përshkruar nga disa biznese me një krahasim figurativ si “Ngushtica e Hormuzit”, duke nënkuptuar hapje dhe mbyllje të vazhdueshme të shërbimeve.

Bizneset thonë se situata ka ndikuar edhe në mosrealizimin e aplikimeve elektronike, mosshfaqjen e të dhënave fiskale dhe mospranimin e nënshkrimeve elektronike, duke shkaktuar vonesa të konsiderueshme në shërbimet online.

Pak ditë më parë, autoritetet kishin njoftuar një ndërprerje të planifikuar të platformës për mirëmbajtje dhe përmirësim teknologjik, por problemet duket se kanë vijuar edhe pas rikthimit të saj në funksion./ CNA





Lajmet e fundit nga