Dosja/ Sekuestrimi i pasurive të Karçanajt, si e mori apartamentin nga ish-numri 2 i AKSHI-t

27 Maj 2026, 21:31, Aktualitet CNA

Dosja/ Sekuestrimi i pasurive të Karçanajt, si e mori apartamentin

Emisioni “Inside Story” në Top Channel mbrëmjen e sotme ka publikuar detaje nga dosja hetimore për aferën e AKSHI-t.

Në materialet e publikuara nga emisioni thuhet se nga hetimet ish-numri 2 i AKSHI-t, Daniel Shima është zbuluar si personi kyç për një transaksion në lidhje me një apartament në Rrugën e Kavajës.

Apartament i cili është në listën e pasurive që i janë sekuestruar ish-drejtoreshës së AKSHI-t, Mirlinda Karçanaj.

Në lidhje me apartamentin e sekuestruar në Rrugën e Kavajës, në dosjen hetimore thuhet se në vitin 2017 kjo pronë është blerë nga shtetasi Rafael Bistri, ndërsa në vitin 2018 ky shtetas ia ka shitur këtë pronë shtetases Enxhi Shima e cila rezulton të jetë motra e ish-numrit 2 të ASKHI-t, Daniel Shima.

Më pas, për këtë pronë, motra e Daniel Shimës ka lidhur kontratë shitblerje me shtetasen Gjenovefa Karçanaj, nëna e ish-drejtoreshës së AKSHI-t, Mirlinda Karçanaj.

Publikimi i “Inside Story”

Dokumenti i sekuestros nxjerr në pah një skemë, atë që është denoncuar më parë. Daniel Shima zbulohet si personi kyç për një transaksion që lidhet me një apartament në rrugën e Kavajës, i sekuestruar Mirlinda Karçanajt.

““Nga analizimi i dokumentacionit të cituar më sipër, dokumentohet se më datë 7 Mars të vitit 2017, shtetasi Rafael Bistri ka marrë hua shumën prej 80.000 euro, nga Erisa Malenllari dhe Andis Papa, dhe më datë 8 Mars 2017, ka nënshkruar kontratën e shitblerjes së pasurisë së paluajtshme, pronë të cilën rezulton se ky shtetas ia ka shitur rreth 1 vit më vonë, shtetases Enxhi Shima, (e motra e shtetasit Daniel Shima). Më tej, nga analiza kronologjike e veprimeve të kryera mbi këtë pronë, rezulton se shtetasja Enxhi Shima, ka lidhur kontratë shitje me palë blerëse Gjenovefa Ilia Karçanaj”, thuhet në dosje.