E fundit!

11:24 Aktualitet

SPAK merr të pandehur ish-kryebashkiakun socialist

SPAK ka marrë të pandehur ish-kryebashkiakun socialist të ...

Anëtarësimi në BE/ Soreca: Puna e bërë nga Shqipëria duhet të shpërblehet

15 Nëntor 2023, 19:07, Aktualitet CNA

Anëtarësimi në BE/ Soreca: Puna e bërë nga

Ambasadori i BE-së në ikje, Luigi Soreca

Ambasadori i BE-së në ikje, Luigi Soreca, ka dalë krah Shqipërisë për procesin e anëtarësimit në BE.

Soreca tha në një intervistë për Zërin e Amerikës se Shqipëria ka bërë përparime dhe tashmë ka ardhur koha që të kjo mundësi të mos humbasë.

“Shqipëria ka pasur një vit 2023 shumë pozitiv, procesi i shqyrtimit (screening) ka qenë i suksesshëm. Komisioni Evropian është gati për të ecur përpara. Pra Shqipëria ka bërë progres nga ky këndvështrim. Por tani ka ardhur koha të mos e humbasim këtë mundësi. Në këta katër vjet Shqipëria duhet të përshpejtojë ritmin e reformave. Pra, udhëheqja e fortë politike, disiplina dhe profesionalizmi në gjithë administratën publike do të ishin shumë të rëndësishme. Shpresojmë që në fund të kësaj periudhe, Shqipëria do të jetë në një pozicion të atillë, së bashku me gjashtë vendet e tjera, që të korrë përfitimet e kësaj përpjekjeje të rëndësishme nga BE-ja”, u shpreh diplomati.

Ambasadori i BE-së komentoi edhe rekomandimet e Komisionit Europian që në fund të vitit të nisin bisedimet për grupkapitujt e parë, me Shqipërinë, ndërsa theksoi se puna e bërë deri tani nga Shqipëria duhet të shpërblehet.

“Mendoj se është e rëndësishme këtu të themi se Raporti për Shqipërinë i nxjerrë nga Komisioni ka identifikuar qartë objektivin e hapjes së grupimit të parë me Shqipërinë deri në fund të vitit, të ashtuquajturit kapituj themelorë, 23 dhe 24. Ky është objektivi për të cilin Komisioni Evropian po punon me Shtetet Anëtare.

Siç e thatë edhe ju, dhe me të drejtë, sepse ky është rregulli i shtëpisë, varet nga shtetet anëtare në Këshill që të vendosin. Po bëhen diskutime, po vlerësohen pozicione të ndryshme. Mendoj se është e rëndësishme tani të mbajmë parasysh synimin përfundimtar, të sigurohemi se puna e bërë deri tani do të shpërblehet.

Për çështje specifike nuk do të hyj në hollësi, kuptohet, por shpresa jonë është që të gjendet një zgjidhje e shpejtë duke respektuar plotësisht shtetin e së drejtës”, nënvizoi Soreca./ CNA