web counter
LEXO PA REKLAMA!

SHKARKO APP

App Store
Google Play

E fundit!

x

Aksionet në rrugët nacionale/ Shkodër-Koplik, familjarët heqin muret rrethuese

19 Gusht 2025, 14:04, Aktualitet CNA

Aksionet në rrugët nacionale/ Shkodër-Koplik, familjarët

Inspektorati Kombëtar i Mbrojtjes së Territorit ka shpërndarë rreth 350 procesverbale ndaj banorëve dhe bizneseve që kanë zënë hapësira brenda distancës së përcaktuar me ligj nga rruga në akset Shkodër-Lezhë dhe Shkodër-Hani i Hotit.

Teksa bizneset duken më insistuese, familjarët kanë nisur punën për heqjen e mureve rrethuese dhe zhvendosjen e tyre në një perimetër 6 metër larg aksit kryesor.

Segmenti Shkodër-Koplik mbetet më problematiku për shkak të dendësisë së ndërtimeve. Kryefamiljarët e vënë gishtin tek institucionet, të cilat kanë lejuar ndërtimin e objekteve e tashmë kërkojnë prishjen e tyre duke shkaktuar dëm ekonomik për ta.

“I takon 2 metër me u zhvendos, po bëj themelet dhe e zhvendos. Dëmtuar jam, por nuk kam çfarë të bëj. Duhet të më njoftonin më herët sepse kur e kam bërë ka qenë 6 metër nga rruga, por më pas u bë autostrada dhe muri doli më afër. Mua më ka dëmtuar 30 m linear në të dyja anët e po ashtu mur, rrjetë e pllaka. Tokën e kam me dokumentacione dhe e kam blerë me para. Dhe 60 metër sot më ikin nga kjo tokë. Duke punuar jam vetëm sepse fëmijët i kam jashtë dhe po e zhvendosi”.

“Kemi harxhuar shumë para e po ta dinim nuk do ta kishim bërë atë mur. 3 herë e kam bërë murin e tani përfundojmë duke e prishur sërish. Shumë keq. Nuk jemi kundër të lirohet rruga, por ne këtu kemi qenë dhe askush nuk na tha sa metër duhej larg autostradës. Kur nisën t’i prishnin të tjerët i prishëm edhe ne.”

Autoritetet raportojnë se rreth 70% e subjekteve kanë respektuar afatin duke liruar hapësirën vetë, ndërsa për pjesën tjetër, do të nisë ndërhyrja me penalitete dhe sekuestrime. Segmentet Lezhë-Shkodër dhe Lezhë-Milot janë ndër më të rrezikshmit për sa u përket aksidenteve fatale në vend, ku ndërtimet e paligjshme në anë të rrugës janë cilësuar faktorë të drejtpërdrejtë të rrezikut./ CNA





Lajmet e fundit nga