web counter
LEXO PA REKLAMA!

SHKARKO APP

App Store
Google Play

A do të na e nderojë Sokol Sadushi Gjykatën Kushtetuese me Genta Bungon?

17 Korrik 2025, 13:38, Aktualitet CNA

A do të na e nderojë Sokol Sadushi Gjykatën Kushtetuese me Genta

Në muajt e fundit të vitit 2024, tema e ditës dhe si rrjedhojë edhe e debatit publik, u bë mandati i kryetares së Gjykatës së Lartë, zonjës Holta Zaçaj.

Diskutimi për temën u nxit personalisht nga kryetari i Gjykatës së Lartë, Sokol Sadushi.

Diskutimi pasoi një dorëheqje edhe sot e kësaj dite të diskutueshme të një tjetër anëtareje të Gjykatës Kushtetuese, e cila papritur nuk priti më as zëvendësuesin, por sikur e pickoi diçka lëshoi mandatin e admiruar nga shumë juristë.

"Dorëheqja" e Elsa Toskës, pra, u pasua nga një debat që mori trajtat e një beteje të vërtetë për mandatin e Holta Zaçajt.

Sokol Sadushi që fshihet edhe pas dorëheqjes së Elsa Toskës, nisi distribucionin e një materiali në të cilin llogaritej mandati i Holta Zaçajt dhe ajo metodë përllogaritjeje dukej se prekte (gjithmonë nëse i besojmë mënyrës se si llogarit Sadushi), me të njëjtën formë edhe mandatin e sapolëshuar në mënyrë të parevokueshme nga Toska.

Kryetarja e Kuvendit, në deklarimin e vakancës për Elsa Toskën, ndoqi logjikën e ruajtjes së mandatit të plotë 9-vjeçar për vakancën e krijuar.

E këtu filloi edhe debati ndaj saj.

Në lidhje me të gjitha mandatet e dhëna rishtazi për gjyqtarët e Gjykatës Kushtetuese pas reformimit nga reforma e drejtësisë, askush nuk ishte kujdesur të parashikonte respektimin e kërkesës për rinovimin e Gjykatës Kushtetuese me qëllim shkallëzimin e mandateve dhe rifreskimin e Gjykatës jo në bllok, por me raunde kohore.

Debatit nuk i dilte në kokë askush sa kohë që secila palë u qëndronte me interpretim parimeve të ndryshme të përllogaritjes së mandateve.

Nëse Kuvendi ndiqte parimin e ruajtjes së paprekshmërisë së mandatit, dukej se Sokol Sadushi kishte zgjedhur t'i interpretonte ato duke i dhënë prioritet ripërtëritjes së mandateve dhe jo paprekshmërisë së tyre.

Konflikti detyroi Gjykatën Kushtetuese që të mblidhej për t'u shprehur për mandatin e zonjës Zaçaj dhe me sa duket, Gjykata vendosi që të zgjidhte si prioritet ripërtëritjen dhe jo paprekshmërinë.

Deri këtu Gjykata Kushtetuese ishte e qartë për ata që kuptojnë nga termat. Por ajo që nuk dihet ende është nëse vetë Gjykata Kushtetuese e ka kuptuar interpretimin dhe marrjen e pozicionit që ka bërë. Ai nivel juristësh që hanë bukë sot si gjyqtarë kushtetues, nuk jep shumë shpresa që të kuptojnë ato që u serviren për të firmosur.

Debati, sidoqoftë, pati një të mirë të madhe sepse palët e interesit u dekonspiruan paq për emrat e anëtarëve të Gjykatës Kushtetuese, të cilët i kontrolluakan pa kushte.

Pikërisht në mes të këtij debati për emrat e ushtarëve ndërhyri Presidenti Begaj, i cili pasi kuptoi pozicionin e Gjykatës Kushtetuese që i jepte prioritet përtëritjes së mandateve, duke qenë edhe organ emërtese në një pjesë të tyre, iu drejtua me kërkesë Gjykatës Kushtetuese me të cilën i kërkonte që Gjykata të ezaurojë me vendim çfarë ka zgjedhur si parim prioritar dhe të ndajë një herë e mirë shapin nga sheqeri për të gjitha mandatet e anëtarëve të Gjykatës Kushtetuese.

Vetë Holta Zaçaj, që më parë ishte pajtuar me fatin e vet, kuptoi që nëse ishte zgjedhur të sakrifikohej nga kolegët duke u fshehur pas parimit të ripërtëritjes, atëherë kolegët duhet t'i zgjidhnin edhe 2 shoqërues pasiqë ripërtëritja e një Gjykate të tërë nuk bëhej dot vetëm me kokën e saj në tepsi.

Me atë rast edhe Zaçaj kuptoi diçka që mund t'i hynte në punë.

Sot jemi në korrik! Mandati i e Zaçajt ka përfunduar, por zëvendësuesi kalon nga Këshilli i Lartë i Drejtësisë ku Sokol Sadushi është kryetar të paktën deri në dhjetor.

Faktorë jo pa peshë, po përgatisin zonjën Genta Bungo për anëtare të Gjykatës Kushtetuese.

Borxhlinjtë e vetingut që janë edhe në sistemin e drejtësisë e duan Bungon anëtare të Gjykatës më të Lartë ku shkruhet doktrina kushtetuese.

Në fakt, emërimi i Bungos do t'i vinte kapakun kolorit të paaftësisë që mbizotëron tashmë Gjykatën Kushtetuese.

Sot në atë Gjykatë ke juristë që nëse i ke avokatë e ke të garantuar humbjen e gjyqit. Si gjyqtarë kushtetues po na garantojnë humbjen e vetë Kushtetutës.

Genta Bungo u mungonte me thënë të drejtën./ CNA





Lajmet e fundit nga