E fundit!

11:17 Aktualitet

“Albanian Files”/ Klodjan Braho: Askush nuk është imun për SPAK, nëse dikush ka prova t’i depozitojë

Nga opozita në Komisionin për Nismat Qytetare, kreu i SPAK...

80-vjetori i poetit Ali Podrimja/ Përparim Kabo: A duhej kaluar në heshtje? Ai i takon kombit shqiptar…

30 Gusht 2022, 13:07, Aktualitet CNA

Profesor Përparim Kabo ka ngritur shqtësimin për kalimin në heshtje të 80-vjetorit të poetit Ali Podrimja.

Përmes një postimi në rrjetet sociale, Kabo shkruan se Podrimja është nga majat e poezisë shqipe, e gjuha shqipe është gjuha e një kombi. Sipas Kabos, Ali Podrimja i takon kombit shqiptar kudo ku ai është në rrënjë dhe histori.

Mes të tjerash profesor Kabo thekson se heshtja ndaj tij u bën nder atyre që kombin e duan pa poetët e lirë dhe me bejtexhinjtë e paguar.

“A duhej kaluar në heshtje 80-vjetori i poetit kombëtar Ali Podrimja?! Ndokush mund të thotë me habi, po pse, si kombëtar? Po, po, për mua Ali Podrimja është nga majat e poezisë shqipe, e gjuha shqipe është gjuha e një kombi, poezia e tij tejkalon shumë poezi që më shumë u tullumbacuan nga propaganda, nga pushteti, nga politika dhe mediat. Poetika e Podrimjes është një qiell i bukur kushtrimi, një vargëresh të lira, është shtrëngata që shkrep... Ali Podrimja i takon kombit shqiptar kudo ku ai është në rrënjë dhe histori, në bedena të fatit dhe në flladime dashurie, në porosi biblike dhe në amanete njerëzore. Poezia e tij është si një poçe dheu e gatuar me gjak e baltë Dardanie ku digjet e butë një flakë frymëzimi, herë vajtuese dhe e butë, herë e kreshpur dhe shpërthyese. Mos e ndani poezinë me krahina dhe me qarqe, me copza shtetesh ku ka vetëm një popull dhe një gjuhë, mos e emërtoni poezinë me poet patriark apo me poet të madh, poezia o është ose nuk është. Ali Podrimja është sot 80 vjeç, ecën buzë Drinit epik si një hije e bukur dhe lëshon ujërave Vargjet e Pakënduara, si dikur Migjeni Këngët e Pakënduara.... Ali Podrimja ishte kombi shqiptar me krenarinë dhe vuajtjen. Kombi ka në deje gjakun dhe shpirtin e tij poetik.... Ai lindi më 28 gusht 1942 në Gjakovë, atje ku hovet gjaku.... Fati i një kombi lexohet te harta e shpirtit të poetit...ndaj unë ta lexoj testamentin tënd Podrimja ynë i bukur....Heshtja ndaj teje u bën nder atyre që kombin e duan pa poetët e lirë dhe me bejtexhinjtë e paguar.... Mirënjohje Ali Podrimja...kaloi edhe 28 gushti i vitit 2022....ju ishit, jeni, mbeteni sepse nëse ka diçka të jetëjetshme, kjo është poezia...Oh poeti ynë shqiptar, oh poeti ynë i kombit! P.Kabo, 30 gusht, 2022

ROZAFATI

Secili i falëm nga diçka, kush emrin, kush eshtrat i la nga gjaku, nga zjarri, koha, sahere eksplodoi rreth diellit tonë sytë shpella i bëmë, në bjeshkë s’pushuan tupanët se secili i falëm nga diçka, armikut ia shtruam rrugën me kufoma deri te zemrat tona e ai kurrë s’e shkeli perënditë tona kurrë s’mun i arriti se secili i falëm nga diçka, kush emrin, kush eshtrat i la.