VIDEO/ Liverpuli “skuq” "Wembley"-n, një grek i jep fitoren në FA Cup

14 Maj 2022, 19:02, Sport CNA

Liverpuli vazhdon ëndrrën për të fituar katër trofe brenda një sezoni, teksa në “Wembley” të kuqtë triumfuan nga goditja e 11-metërshave pas 120 minutash lojë pa gola ndaj Chelseat. Të kuqtë u treguan më të saktë nga ruleta e penalltive dhe në fund ?skuqën? “Wembley”-n, teksa regjistruan suksesin numër tetë në FA Cup, një sukses që u mungonte prej 16 vitesh.

Sa i takon kronikës së ndeshjes, shkëndijën e parë e dhuroi Luis Dias i Liverpulit, i cili u ndal nga portieri Mendi, ndërsa Chelsea u kundërpërgjigj me anë të Kristian Pulisiçit, teksa gjuajtja e amerikanit shkoi ngjitur me shtyllën e mbrojtur nga Alison. Ndërkohë, në fraksionin e parë mundësitë për londinezët ishin të shumta me Markos Alonson, por edhe Romelu Lukaku që nuk u treguan të saktë.

Një tjetër episod i rëndësishëm për pjesën e parë ishte edhe dëmtimi i Mohamed Salahut, i cili u zëvendësua në minutën e 33-të nga Diego Jota, ndërsa në dyshim tashmë është edhe prezenca e tij në finalen e Champions League ndaj Real Madridit.

Sakaq, edhe fraksioni i dytë nisi më mirë për Chelsean me Alonson që këtë herë u ndal nga traversa. Megjithatë, në vazhdimin e pjesës së dytë, të kuqtë e morën veten dhe patën mundësi me anë të Luis Diasit dhe Diogo Jotas.

Ndërkohë, në minutën e 85-të Robertson u ndal nga shtylla me ndeshjen që iu drejtua kohës shtesë, e cila në fakt nuk prodhoi më raste dhe skuadrat iu drejtuan goditjes së penalltive. Të kuqtë u treguan më të ?ftohtë?, teksa vendimtar ishte goli i grekut Tsimikas, ndërsa më parë kishte gabuar Mane që u ndal nga bashkëkombasi i tij Mendi. Për Chelsean më parë gaboi Azpilikueta dhe Mount që u ndalën nga Alison, dy gabime që rezultuan fatale për ekipin e drejtuar nga trajneri Tomas Tuhel.

Ky është trofeu i dytë sezonal për të besuarit e Jyrgen Klopit që më herët kanë festuar në finalen e Carabao Cup, ndërsa janë në garë për titullin e Premier League, si dhe në finalen e Champions League ku do të sfidojnë Real Madridin më datë 28 maj në Paris.