Lindi në tualetin e QSUT/ Gjinekologia shpjegon rastin e pazakontë të 20-vjeçares që nuk e dinte që ishte shtatzënë

19 Prill 2022, 17:29, Lifestyle CNA

Një ditë më parë, mediat shkruan se një vajzë 20-vjeçare ka lindur në tualetin e Urgjencës së QSUT-së pasi kishte shkuar atje rreth orës 02:00 të mëngjesit pas dhimbjeve të forta të barkut.

Kjo ishte një ngjarje e pazakontë që shkaktoi habi te vetë ajo, familjarët por dhe tek qytetarët,

Lidhur me këtë rast ka folur dhe gjinekologia Mimoza Keta e cila ka shpjeguar se konsiderohet ?shtatzëni kriptike? ose ndryshe e fshehtë.

Në rastet e një shtatzënie të tillë, mjekja nënvizon se është e padukshme deri në javën e 22-të, por që më pas është e pamundur të mos e dallosh.

?Kjo është një vajzë e re, 20 vjeç dhe nuk është minorene që të mendosh që nuk di gjë dhe ajo ka kryer një raport seksual që ka ngelur shtatzënë. Mund të ndodhë që shqetësimi që ajo ka, së pari, në këto lloj shtatzënish, nëse bën një test shtatzënie që nuk i ka shkuar mendja ndoshta ndonjëherë për ta bërë do i rezultonte pozitiv sepse rritet një hormon që në testin shtëpiak jep patjetër dy viza dhe tregon që je shtatzënë. Vonesa menstruale nuk është shenjë e sigurt e shtatzënisë, por prania e këtij hormoni është shenjë e sigurt që tregon praninë e shtatzënisë në mitër ose jashtë saj.?

E pyetur nëse një shtatzëni shoqërohet gjithmonë me një ndërprerje të menstruacioneve, dr. Keta tha se jo gjithmonë.

?Mundet që në periudha të caktuara ose në ditët kur gruaja pret menstruacionet të ketë një gjakrrjedhje të lehtë që korrespondon me ditën e menstruacioneve dhe ajo mendon ?më erdhën, nuk kam mbetur shtatzënë?. Megjithatë kjo shtatzëni kriptike mund të mbetet e tillë deri rreth javës 20-22-të të shtatzënisë dhe rastet në botë nga studimet kanë një raport 1 me 2500. Nuk kanë shenja vagale të shtatzënisë si të vjella, lodhje, gjumësia etj.?

Por si shpjegohet që nuk është vënë re rritja e barkut?

?Deri në javën e 20, nëse statura është e lartë, nuk të duket shumë barku dhe nuk mendon që je shtatzënë. Në momentet pas javës së 22 që fillojnë lëvizjet e para të bebit, këtu merr fund kjo shtatzëni kritike që ne i themi shtatzëni e fshehtë. Ndryshimet në fytyrë, një fytyrë më e shëndoshë, faqet si petull, dalin shenjat e shtatzënisë, fryrja në gjoks dhe prominimi i barkut që fillon të dalë, është tremujori i dytë i shtatzënisë kur barku del përpara dhe nëna e kupton sepse ndien lëvizjet e fëmijës.?/CNA.al