Shifrat e çmendura, Armando Broja bën me dhimbje koke yjet e Çelsit

23 Shkurt 2022, 06:43, Sport CNA

E gjithë Anglia flet për Armando Brojën. Sulmuesi shqiptar po bën një sezon spektakolar në Premier Ligë i huazuar nga Çelsi te Sauthemptoni. 20-vjeçari e ardhmja e të cilit mbetet një enigmë, i lë pas sulmuesit e skuadrës së tij blu në shumë kategori. Autori i gjashtë golave këtë sezon në Premier Ligë ka shënuar sa askush në skuadrën kampione bote.

Kjo do të thotë se ylli i Kombëtares kuqezi lë pas edhe transferimin rekord në ?Stamford Bridge?, Romelu Lukakun (97.5 milionë paund), Hakim Zijehun, Kai Havercin, Kristian Pulisiçin, Timo Vernernin dhe Kallëm Hadson-Odoin. Djaloshi i lindur në Slau kryeson në kategoritë e tjera të rëndësishme përveç asaj të golave, në raportin minuta për gol, ndërsa e tund rrjetën çdo 205 minuta krahasuar me Vernerin, i cili renditet i dyti me gol çdo 258 minuta.

Broja vjen i dyti në kategorinë e minutave që i duhen për të shënuar gol ose dhënë asist dhe vetëm numri 0 i pasimeve për gol e zbret atë nga vendi i parë i cili mbahet nga Zijeh. Bomberi më i mirë i Ralf Hazenhytelit nuk është thjesht vrastar përpara porte, por statistikat thonë se është edhe dribluesi më i mirë. Me 1.8 driblime të suksesshme për çdo ndeshje në Premier Ligë gjatë 2021-?22, Armando është më i sakti ndër sulmuesit e skuadrës që i ka në pronësi kartonin.

Megjithatë, ai nuk dominon në çdo kategori. Është e vërtetë që Broja ka shënuar numrin më të madh të golave, por kur vjen puna tek asistet, saktësia në pasime dhe goditjet për 90 minuta ai nuk është më i miri për skuadrën e tij. Gjithsesi, ai i ka statistikat po aq ose edhe më të mira në krahasim me Lukakun në të gjitha kategoritë e sipërpërmendura.

Dhe për ta shtuar më shumë presionin ndaj ?Big Rom?, janë statistikat e tij të ndeshjes së fundit, kur belgu preku vetëm 7 herë topin në derbin kundër Kristal Palasit të shtunën, ndonëse luajti për 90 minuta. Kjo është një nga shumë arsyet përse ?Shenjtorët? dëshirojnë ta transferojnë përfundimisht talentin në merkaton e verës.

?Ai e di se sa e rëndësishme është për të si një futbollist që të luajë në vazhdimësi. Këtu ai ka një shans dhe ka treguar se i përshtatet skuadrës sonë. Ka shumë shembuj ku futbollistët pasi kanë ndryshuar klube nuk luajnë më siç kanë bërë me ne?, e nxiti Ralf Hazenhytel. Por këto thirrje duhet të dëgjohen edhe në shtëpinë e bluve të Londrës që po mendohen mirë përpara se të humbasin një talent që sapo ka shpërthyer për të mos u penduar më pas.