web counter
LEXO PA REKLAMA!

SHKARKO APP

App Store
Google Play

E fundit!

x

Fiks Fare/ Çudia në Burgun e Lushnjes, stomatologu firmos dokumentet e tenderit të riparimit të autobusit

15 Dhjetor 2021, 20:58, Denoncim CNA

Fiks Fare denoncoi abuzimet e Burgut të Lushnjes me tenderin për riparimin e autobusit. Redaksia e emisionit investigativ siguroi dokumentet e këtij tenderi, të zhvilluar në muajin shtator 2020, ku rezulton se fondi ishte nën 800.000 lekë. Në këtë procedurë u kualifikuan 4 firma, ku sipas rregullores u ftua firma e parë me ofertën më të ulët.

Por, ajo nuk mori pjesë, ndërkohë që nga firma e parë u kalua te firma e tretë! Firma e dytë u ?harrua? dhe u shpall fitues i treti. Në dokumente kishte një sërë kriteresh që duhet të bënte, madje edhe ndërrimin e motorit të autobusit. Por, motori nuk u ndërrua, vetëm sa u riparua.

Në dokumente rezulton se firma me ofertën më të ulët ishte subjekti ?Sokol Rrokaj?, me vlerë oferte 563 000 leke. I dyti ?Luxode Studio? me ofertë 569 000 lekë. I treti ?Arteo 2018? me vlerë 579 000 leke dhe i katërti ?NovoAkti? me vlerë 580 000 lekë. Operatori i parë nuk ka marrë pjesë, ndërkohë IEVP Lushnje duhet që të kalonte te oferta e dytë ?Luxode Studio?. Ky operator ka konfirmuar në sistemin e prokurimit elektronik, por nga njësia e prokurimit është kaluar si fitues oferta tretë ?Arteo 2018? pa argumentuar përse u s?kualifikua operatori ekonomik i renditur i dyti. Ndërkohë, edhe i treti ?Arteo 2018?, nuk është paraqitur në kohë, por sërish u shpall fitues.

?Fiks Fare? ka siguruar një dokument, nga sektori i projekteve dhe shërbimeve në Drejtorinë e Burgjeve, ku është bërë verifikimi fizik i autobusit. ?Në zërin e punimeve me nr.11, motorr mjeti King Long, parashikuar në ?ftesën për ofertë? dhe urdhrin e prokurimit nuk përputhet me kontrollin fizik të punimeve të kryer. Dhe konkretisht nuk ka vendosje motori të ri, marka MAN, apo të përdorur për automjetin, por ai ekzistues. Kjo vërtetohet me etiketën e motorit të mjetit ?King Long? me pamje filmike. U verifikua procesverbali i marrjes në dorëzim të pjesëve rikupero nga ku rezultoi se komisioni nuk ka marrë në dorëzim motor të ndërruar të ri ose të vjetër, por bllok cilindrash të motorit ekzistues të riparuar? thuhet në këtë dokument.

Fiks Fare udhëtoi në Burgun e Lushnjes, në fshatin Kosovë e Madhe. Gazetarët kërkuan që të takonin drejtorin Zoi Rrushi, por edhe personat e tjerë që kishin hartuar këto dokumente. Por, asnjë prej tyre nuk denjoi të japë shpjegime. Ndërkohë, një specialist informacioni i tha gazetarëve se informacionin duhet ta japë Drejtoria e Përgjithshme e Burgjeve. ?Kontaktoi drejtori institucionit me drejtorinë e përgjithshme. Duhet të shkoni atje? tha specialisti, ndërkohë që gazetarët tentuan që të telefononin përgjegjësin e prokurimeve si dhe drejtorin. Por, asnjë prej tyre nuk iu përgjigj telefonatave.

Gazetarët i drejtohen me një kërkesë për informacion Drejtorisë së Përgjithshme të Burgjeve, të cilat pohojnë se është bërë një inspektim dhe janë konstatuar problematikat me tenderin dhe ndërrimin e motorit. ?Kjo procedurë prokurimi është zhvilluar në rrugë elektronike, nga IEVP Lushnjë. Ka rezultuar që është shpallur si fitues oferta tretë OE ?Arteo 2018?, për shkak të mos paraqitjes së dy ofertave të para. Nga verifikimi fizik është konstatuar se motori i autobusit nuk është ndërruar fare, por i është nënshtruar riparimit. Procedura është audituar dhe janë marrë disa masa. Për Zoi Rrushi, drejtori i IEVP Lushnjë i është dhënë masa disiplinore ?vërejtje me shkrim?. Për Maringlen Myftari, specialist finance IEVP Lushnjë i është dhënë masa disiplinore ?vërejtje me paralajmërim’? thuhet në përgjigje.

Më tej, Drejtoria thotë se ka shkarkuar nga detyra z. Myfit Nezha, përgjegjës i Sektorit Logjistik në IEVP Lushnjë. Ndërkohë që, çuditërisht, është marrë masë ?vërejtje me shkrim? edhe për stomatologun z. Kujtim Dosti. ?Në vlerësim të gjetjeve të auditit dhe shkeljeve është depozituar kallëzim penal për zyrtarët e IEVP Lushnje dhe për operatorin ekonomik ?ARTEO 2018?? thuhet në përgjigje. Pyetjes se, sa herë pas riparimit ka pësuar defekt, Drejtoria e Burgjeve thotë se ka pësuar 3 herë. Gazetarët tentuan që të marrin informacion edhe nga kompania ?Arteo 2018?. Fillimisht, administratori pohon se kanë kryer ato shërbime për të cilat iu është kërkuar. Por, pyetjes se përse autobusit nuk i është vendosur motor i ri, siç ishte edhe në specifikimet teknike, administratori do të pyeste specialistët. Më pas pohoi se do të kontaktonte redaksinë për të dhënë shpjegime. Por, pas telefonatës së dytë, ai nuk dha asnjë shpjegim./tch





Lajmet e fundit nga