Arti në zi/ Ndërron jetë dramaturgu dhe shkrimtari i njohur shqiptar

18 Nëntor 2021, 07:52, Aktualitet CNA

Ndërron jetë në moshën 91 vjeçare dramaturgu dhe shkrimtari i njohur shqiptar, Fadil Kraja.

Fadil Kraja ishte dramaturg dhe letrar i shquar kombëtar. Krijimtaria dhe emri i tij lidhen ngushtë me Teatrin Kombëtar Shqiptar dhe Teatrin “Migjeni” të Shkodrës ku në këtë të fundit kontribuon prej 60 vjetësh. Veprat e tij janë luajtur e vazhdojnë të luhen nga trupat teatrale të Kosovës, por edhe të Diasporës e të qyteteve të ndryshme në Shqipëri.

Fadil Kraja u lind në Shkodër, Shqipëri, më 1931. Shkollën e mesme e kreu në gjimnazin e Shkodrës ku spikati me talentin për letërsinë. Studimet e larta i përfundoi në Universitetin e Tiranës, në Fakultetin e Filologjisë, dega Gjuhë-Letërsi. Pas diplomimit punoi në profesionin e mësuesit të cilin e trashëgonte edhe nga familja e tij.

Në vitin 1950, filloi punën për herë të parë si mësues në fshatin Mjedë. Në atë kohë nuk kishte shkollë në këtë fshat kështu që mësimi zhvillohej në shtëpinë e njërit prej banorëve, Hasan Metit. Kjo shkollë kishte 50 nxënës të ardhur nga 8 fshatra: Shelqet, Spathar, Laç, Qyrsaq, Hajmel, Ganjoll, Kaç, Naraç, dhe 4 mësues; Isak Ramadani, Fadil Kraja, Rifat Barbullushi, Gita Shani.

Fadil Kraja kontribuoi për vite me radhë si një mësues i nderuar në fshat e qytet duke nxjerrë nga duart e tij nxënës e studentë që u shquan më pas në fusha të ndryshme psh. në letërsi dhe art.

Fadil Kraja luajti rol të madh edhe në gjallërimin e Gjimnazit të Shkodrës si mesues i letersise. Më vonë ai punoi si pedagog i letërsisë në Universitetin ?Luigj Gurakuqi? – Shkodër.

Për disa kohë drejtoi Klubin e Rinisë dhe më vonë qe anëtar i përhershëm i Këshillit Artistik në Teatrin ?Migjeni?.

Nga viti 1972 gjer më 1992 ka qenë shkrimtar në profesion të lirë, duke vazhduar si pedagog i jashtëm në fakultet dhe njëkohësisht Kryetar i Degës së Lidhjes së Shkrimtarëve dhe Artistëve për Degën e Shkodrës.

Fillimet e para ne krijimtari datojnë në moshë të re. Vëllimi i parë poetik “Kënga ime” (1954) fitoi çmimin e parë në Konkursin Kombëtar të Letërsisë.

Vëllimet poetike

“Kënga ime”

“Melodi malësore”

“Jehona malesh”

Vëllime me tregime

“Kandidatja e fundit”

?Ndodhitë e Nereidës?

“Fajin e kishte Besa”

Romane

?Britma e një gruaje?

?Pengu i diellit?

?Balada e nënës?

Ka shkruar mbi 50 drama dhe komedi të suksesshme te shfaqura në të gjithë teatrot profesioniste të Shqipërisë, si dhe në Kosovë, Mal i Zi, Maqedoni dhe në diasporë. Mes tyre përmenden:

“Fisheku në pajë”, i cili vetem ne Shkodër u shfaq rreth 500 here

“Sinjalet e natës”

“Shpartallimi”

“Baca i Gjetajve”

“Gjaku i Arbërit”

“Djem të mbarë”

“Çështja e Blertës”

“Flamur në dasëm”

“Rozafa”

“Kur flasin zemrat”

“Luani i shtëpisë”

“Çështje familjare”