E fundit!

12:16 Aktualitet

SPAK kërkon 98 vite burg për Durim Bamin, Aldo Avdylin dhe 5 të tjerë

Prokuroria e Posaçme ka dhënë pretencën për disa nga të pa...

Krimi ka mbërthyer vendin/ Qeveria dhe opozita “spektatore”

16 Nëntor 2021, 19:27, Aktualitet CNA

Shqipëria, ndonëse një vend i vogël, mbetet mjaft i zhurmshëm dhe shqetësues për qytetarët.

Ngjarje të ndryshme kriminale vijojnë të trondisin vendin, pothuajse çdo ditë.

E kur krimi është kaq prezent, duket se qeveria dhe opozita i janë dorëzuar dhe po e vështrojnë me qetësi gjithë situatën.

Nga njëra anë, janë gjyqtarët dhe prokurorët, të cilët përmes rryshfeteve lironin persona që ishin të dënuar me burgim të përjetshëm, apo duke nxjerrë për një kohë të shkurtër edhe ata që janë dënuar për dhunë dhe kërcënim vrasje.

Atentati mafioz i ditës së shtunë ku mbetën të vrarë dy persona, prishi qetësinë jo vetëm të familjarëve të viktimave, por edhe qytetarëve të tjerë. Njëri nga viktimat e asaj nate, i cili akuzohej për një sërë veprash penale, ishte liruar nga gjykata për mungesë provash. Por ndoshta vetë ?provat? i kushtuan jetën.

Një tjetër rast është edhe vrasja e një vajze të re pak kohë më parë, Sabrinës, e cila humbi jetën nga duart e ish bashkëshortit të saj. Përmes falsifikimit të një epikrize mjekësore, ai fitoi lirinë brenda një kohe të shkurtër.

Si këto raste, ka edhe shumë të tjera, të cilët për faj të gjyqtarëve dhe prokurorëve kanë tronditur opinionin publik.

Mbrëmja e sotme ishte sërish shqetësuese.

Shqiptarët u tronditën, kur fillimisht në media u raportua se në një fshat të Fierit ishte rrëmbyer një fëmijë. Pas vënies në dijeni, policia nisi kërkimet, ku rezultati ishte tragjik. Një i mitur, i rrëmbyer nga një person me probleme të shëndetit mendor ishte vrarë dhe më pas groposur në oborrin e shtëpisë së këtij të fundit. I njëjti individ, disa vite më parë ka tentuar të njëjtin skenar, ku rrëmbeu një vajzë, por për fat të mirë u shpëtua nga fatkeqësia. Në atë kohë, gjykata e dënoi me katër vite burg dhe e la të lirë.

Pas asaj kohe, edhe pse me probleme mendore, shteti nuk mori asnjë masë. Prej shumë vitesh në vendin tonë mungon një investim në sistemin shëndetësor, e më konkretisht në spitalet psikiatrike. Ky investim i munguar po sjell pasoja gjithmonë e më të rënda.

Pas kësaj ngjarje, policia ka vijuar veprimin rutinë. E ka arrestuar, e ka shoqëruar në komisariat, i kanë marrë dëshminë. Më pas do vijojnë procedurat e tjera standarde ku do dal para gjykatës, do marr dënimin e pas shlyerjes do lihet sërish i lirë.

Po çfarë garancie jep shteti, që kur të dal nga burgu ky individ nuk do të bëj të njëjtën gjë? Sa të rrezikuar duhet të ndihen banorët e zonës, kur pas disa vitesh ai të jetë sërish makthi i zonës ku jeton?

Pse nuk reagon qeveria dhe opozita? Sot, Kuvendi vijon në një mbledhje maratonë diskutimet për buxhetin e vitit 2022. Rma dhe Basha, vendosën të bëjnë ?xing? me Foltoren e Berishës, duke dalë në të njëjtin orar. Përveç show-t të rradhës, asnjë gjë nga problematikat dhe shqetësimet serioze nuk u diskutuan.

E kjo situatë nuk tregon gjë tjetër, veçse kryqëzimin e shtetit përballë këtyre fenomeneve dhe duartrokitjet e opozitës, e cila nuk tenton të thotë as edhe një fjalë të vetme.

Këto situata duhet të marrin fund e si të tilla duhet reagim i menjëhershëm dhe i fortë./CNA.al