“Tërmet” në Sekretariatin e PS/ Drejtuesit që u ndëshkuan nga Rama

2 Shtator 2021, 12:51, Politikë CNA

Kryeministri Edi Rama, ka njoftuar sot në Asamblenë Kombëtare të PS, se ka ndryshuar jo vetëm organizimin strukturor të partisë, por edhe të emrave.

Ai ka nxjerrë jashtë sekretariatit, disa nga emrat më të spikatur në PS, si Taulant Balla që ka mbajtur postin e Sekretarit të Përgjithshëm dhe që njëherësh rezulton deputeti më i votuar apo edhe emra të tjerë si Arben Pëllumbi, apo Blerina Gjylameti.

Si krah të djathtë, pra në vend të Ballës, Rama ka propozuar Damian Gjiknurin, i cili ndryshe njihet me nofkën ?tërmeti”.

Ndërsa Blendi Klosin, e ka propozuar në pozicionin e Sekretarit Organizativ në PS, në vend të Arben Pëllumbit.

Jashtë loje Rama ka nxjerrë edhe Alfred Pezën, të cilin e ka larguar nga posti i sekretarit për marrëdhëniet me mediat.

Të njëjtin fat ka pasur edhe Blerina Gjylameti e cila ka mbajtur postin sekretarit Dixhital, post në të cilin Rama ka dërguar Etjen Xhafajn.

E vetmja që ka qenë në këtë sekretariat dhe që është vlerësuar nga kryeministri Rama, është Lindita Nikolla.

Kjo e fundit nga posti i sekretares të Burimeve Njerëzore është propozuar për kryetare Kuvendi.

Nikolla është zevendësuar nga Anila Denaj, e cila deri më sot ka mbajtur postin e Ministres së Financave.

Një tjetër emër që është zëvendësuar nga Rama është edhe Teuta Voda, e cila është është larguar nga posti i sekretares për Marrëdhëniet me Jashtë duke u zëvendësuar nga Romina Kuko.

Ndërsa sekretare për Rininë do të jetë Bojkena Basha, post ky, i cili është mbajtur më herët nga Gent Cakaj.

Jashtë loje, pa asnjë funksion partiak dhe politik, Rama ka nxjerrë edhe Ilir Beqajn , si dhe ka larguar Laert Durajn.

Pasi janë janë shkrirë dy poste sekretariatesh si ai i Emigracionit dhe për Koordinimin e Këshillave të Rajoneve.

As sekretar per çështjet Zgjedhore, nuk do të ketë më.

Kujtojmë se ky post është mbajtur nga Damian Gjiknuri.

Sekretari i përgjithshëm Damian Gjiknuri

Sekretari Organizativ do të jetë Blendi Klosi

Sekretari Dixhital Etjen Xhafaj

Burimet Njerëzore Anila Denaj

Sekretare e Gruas Etilda Gjonaj

Sekretare për Marrëdhëniet me Jashtë- Romina Kuko

Sekretare e Rinisë- Bojkena Basha