Nuk përmbahet Galdini/ “LRE e dënuar me harresë nga regjimi skuthokratik”

22 Gusht 2021, 12:53, Politikë CNA

Një ditë më parë në Sheshin Nënë Tereza është organizuar një marshim nga qytetarët dhe LRE.

Kreu i LRE, Arian Galdini është drejtuar me tone shumë të ashpra ndaj tre partive politike në vend, PS, PD dhe LSI.

Sipas Galdinit LRE është e vetmja parti që ka njerëz real por është e dënuar me harresë nga tre partitë, PS, PD dhe LSI, të cilat ai i quan Regjimi Skuthokratik.

“LRE është e vetmja parti politike në Shqipëri, që ka njerëz realë, zhvillon aktivitete reale politike, por që është e dënuar me harresë nga Rregjimi Skuthokratik PS – PD – LSI – Tom Dosh. LRE është e vetmja parti politike e mohuar në Shqipëri.

Në mes të Tiranës marshojnë disa qindra qytetarë, buçasin qindra zëra, e rrahin qindra zemra guximtare, e megjithatë asnjë media, asnjë, nuk denjon të vijë për të kryer detyrën e misionin e informimit të publikut. Shqiptarët kanë të drejtë ta dinë që LRE ekziston e mediat do të duhej tua jepnin këtë informacion e dijeni qytetarëve shqiptarë. Por Klubi i Plaçkaxhinjve PS – PD – LSI – Tom Dosh, kanë vendosur që LRE të dënohet me harresë e asnjë media të mos e përmendë e as pasqyrojë LRE.

Marshimi i Dinjitetit ishte prova më e fundit, se ndonëse qindra qytetarë dalin bashkë në një shesh, mediat do ti mohojnë. Por kjo nuk e step e as e ndal LRE. LRE nuk ka lindur në media e as prej mediave. LRE ka lindur nga qytetarët, me qytetarët, për qytetarët. Marshimi i Dinjitetit është nënshkrimi i vendosmërisë së familjes politike LRE, për të rezistuar, për të vazhduar aktivitetin tonë politik me këmbëngulje e për tu rritur me qytetarët, nga qytetarët, për qytetarët.

Ne jemi partia politike opozitare dhe e djathtë, që jemi qartësisht, vendosmërisht, energjikisht pro Reformës në Drejtësi, pro SHBA dhe pro BE, kundër hajnisë dhe korrupsionit. Jemi e vetmja parti politike që nuk pranojmë mes nesh asnjë keqbërës, shkelës ligji apo të korruptuar. Jemi e vetmja parti politike e qytetarëve të thjeshtë, të ndershëm, halleplotë e të papërlyer“, shprehet Galdini./ CNA.al