E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Tifozëve të Lazios nuk u del inati me Hysajn/ Banderolë skandaloze në mesnatë për shqiptarin

20 Korrik 2021, 07:03, Sport CNA

Çështja e këngës së Elseid Hysajt si rit prezantimi para shokëve të skuadrës po fillon të marrë përmasa gjithnjë e më serioze. Ai që duhej të ishte një moment humori mes miqsh, është kthyer në një përplasje të mirëfilltë me tifozët e skuadrës mbi ideologji politike. Hysaj zgjodhi të këndonte ?Bella Ciao?, një këngë e vjetër partizane në Itali, por që ka marrë famë përsëri së fundmi si pasojë e serialit ?Casa de Papel?.

Megjithatë, tifozët e Lacios, të cilët janë në një numër të madh mbështetës të ekstremit të djathtë, nuk kanë pëlqyer një këngë të tillë, ndaj kanë vërshuar kritikat në adresë të lojtarit shqiptar, deri në kërcënime. Në këtë situatë, edhe Lacio u detyrua të dalë me një komunikatë, duke mbrojtur futbollistin e duke dalë plotësisht në mbështetje të tij në situatën absurde që u krijua në 24 orët e fundit.

?Është detyra e klubit që të mbrojë një pjesëtar të tij dhe ta largojë nga instrumentalizimet personale dhe politike që qartësisht në këtë çështje nuk kanë të bëjnë aspak me kontekstin informal dhe miqësor në të cilin u zhvillua episodi. Grumbullimi i skuadrës duhet të vazhdojë në përkushtimin maksimal sportiv dhe në klimën e qetësisë që është shfaqur deri më sot?, shkruhej në këtë komunikatë të Lacios, që dilte kundër tifozëve të saj duke insistuar se e kishin instrumentalizuar më kot të gjithë këtë ngjarje, duke vënë në vështirësi mbrojtësin shqiptar.

Si të mos mjaftonin ironitë, talljet apo edhe mallkimet në rrjetet sociale, disa prej tifozëve të Lacios kanë kaluar çdo kufi. ?Calciomerato? ka bërë me dije se disa prej tifozëve të Lacios kanë shkuar darkuar skuadra. Shumë prej futbollistëve kanë qenë larguar, ndërsa ?përballja? është bërë para hotelit ku qëndron Lacio e grumbulluar. Aty pranë është gjendur drejtori sportiv Igli Tare si dhe mbrojtësi i Kombëtares Hysaj. Të pranishëm edhe forca speciale policore, gjithmonë në ruajtje të ekipit kryeqytetas. Pas ofendimeve dhe reagimeve ndaj Hysajt, kjo situatë duket se nuk i ka pëlqyer aspak trajnerit Mauricio Sarri, që raportohet nga mediat italiane se do të reagojë në mbrojtje të futbollistëve të tij.

BANDEROLA SKANDALOZE

Ndërkaq, është thelluar akoma më shumë skandali dje në mbrëmje. Disa tifozë të Lacios kanë vendosur një banderolë fyese në urën ?Corso Francia? ku shkruhej ?Hysaj një krimb, Lacio është fashiste?. Është e paimagjinueshme sjellja e një grupi të tifozëve lacialë kundrejt lojtarit shqiptar vetëm për një këngë. Me sa duket nuk e kanë kuptuar se bëhet fjalë për një të huaj në Itali, që thjesht këndoi një këngë shumë të njohur italiane ?Bella Ciao?, pa pasur parasysh të fyente askënd. Skandal është që një pjesë e tifozerisë laciale ende krenohet me fashizmin dhe sulmon një futbollist profesionist që kurrë më parë nuk është përfshirë në akte politike, apo të ketë cenuar ndokënd.