E fundit!

14:51 Aktualitet

Video- Pas më shumë se 5 orësh, Igli Tare del nga SPAK-u

Ish-futbollisti i Kombëtares shqiptare të futbollit, Igli ...

Greqia e kërkon ushtar, Skënderbeu në hall për kapitenin Meksi

19 Korrik 2021, 07:42, Sport CNA

Skënderbeu dhe Jorgo Meksi vijojnë të jenë në distancë mes tyre. Pasi filluan përgatitjet dhe nuk u pa kapiteni të bashkohej me ekipin, çka solli edhe irritimin e vetë trajnerit bardhekuq, Migen Memelli, duket se situata ka marrë një tjetër rrugë. ?Panorama Sport? shkruan se nuk është çështja e largimit ajo që po e mban kapitenin larg Korçës, as mosarritja e një akordi paraprak me presidentin Takaj për zgjidhjen e kontratës, por shërbimi i detyrueshëm ushtarak për futbollistin bardhekuq.

Siç dihet, Meksi veç pasaportës shqiptare, ka edhe atë greke dhe në bazë të ligjeve të shtetit helen, çdo person i pajisur me pasaportë greke, me mbushjen e moshës është i detyruar të kryejë shërbimin ushtarak. Kjo ka ndodhur edhe me Meksin. I kontaktuar nga gazeta, mbrojtësi i Skënderbeut nuk ka dashur të japë detaje, ndërsa ka thënë se është duke u marrë me disa probleme personale të rëndësishme që duhet t?i zgjidhë, ndërsa nga ana tjetër, burime të konfirmuara pranë kapitenit të Skënderbeut, treguan për gazetën se i gjithë ngërçi qëndron te shërbimi ushtarak.

Meksi, nga sa raportojnë burimet, e ka shtyrë edhe herë të tjera zhvillimin e ushtrisë në Greqi, ndërsa këtë herë situata është pak më e komplikuar, pasi kanë kaluar kohë që lojtari dukej ta kishte ezauruar një gjë të tillë. Gjithsesi, kapiteni bardhekuq po mundohet që të mbyllë sërish dokumentacionin e nevojshëm për të shmangur ushtrinë në Greqi e më pas të bashkohet me ekipin në Korçë, atje ku Skënderbeu prej një jave tashmë ka filluar fazën përgatitore. Më herët korçarët janë përballur me një situatë të ngjashme me iranianin Reza Karimi, i cili pavarësisht cilësive, u la i lirë nga Skënderbeu pikërisht për këtë arsye: kryerjen e shërbimit ushtarak në vendin e tij.