10 të vdekur në dy ditë/ Asnjë zyrtar përgjegjës

27 Qershor 2021, 16:10, Politikë CNA

Bilanci i vrasjeve dhe aksidenteve me pasoja fatale në vend sa vjen e rëndohet. Vetëm në dy ditët e fundit 25-27 qershor, kanë humbur jetën rreth 10 persona.

Plazhi i Velipojës u trondit nga një ngjarje e rëndë mesnatën e kësaj të shtune ku katër persona mbetën të vrarë, ndërsa dy të tjerë u plagosën pas një konflikti me armë që u shënua në orën 00:30 minuta përpara hotel Gocajt.

Mes viktimave janë dy vëllezërit Gocaj, babai i Arjan Ferracakut i vrarë në 2018 dhe një 20 vjeçar. Ndërsa mbetën të plagosur vëllai i Kujtim Verracakut dhe një adoleshent të cilët sipas policisë dyshohet se janë autorë të përfshirë në konfliktit me armë.

Shkak i konfliktit me armë ishte ndarja e pronësisë mbi sipërfaqet me rërë ku vendosen shezllonët.

Ndërkohë që dy ditë më parë një familje e tërë është shuar pas një aksidenti të rëndë automobilistik në aksin Fier-Vlorë.

Viktimë në këtë ngjarje të rëndë mbetën Eduart dhe Silvana Gushi, si dhe dy vajzave të tyre të mitura, Anastasia dhe Eva.

Ngjarja e rëndë që trondit mbarë opinionin publik ndodhi në autostradë, ku një mjet tip Audi, që drejtohej nga një 22 vjeçar, ka goditur mjetin e viktimave nga pas, ndërsa udhëtonte me shpejtësi tej normave të lejuara.

Po ashtu dy ditë më parë, një 82 vjeçar me inicalet Q. K., u bë viktima e radhës e një aksidenti rrugor.

I moshuruari u përplas nga një 25 vjeçar me inicialet M. H., teksa ecte në rrugë.

Me këtë bilanc dy ditor në një vend europian do kishte ikur ministri ‘me vrap’ deri tek kryeministri, por në Shqipëri nuk mban asnjëri përgjegjësi.

Asnjë zyrtar nga ata të rrugëve për rrugët skandaloze pa sinjalistikë!

Asnjë zyrtar i policisë për parandalimin e ngjarjeve kriminale!

Asnjë pushtetar vendor apo qëndror për konfliktet e krijuara midis qytetarëve, nga pronat tek biznesi, etj.

Asnje shef komisariati apo drejtor për ngjarjen në zonën ku drejton!

Askush nuk po mban asnjë pergjegjësi për këtë bilanc lufte ku po iu marrin jetën fëmijëve, po shuhen familje nga çmenduria dhe papërgjegjshmëria që fillon tek çdo qytetar e përfundon tek zyrtarët më të lartë të shtetit.

Shifra flasin shumë, tregojnë se situata ka dalë jashtë kontrollit, ndërkohë autoritetet përgjegjëse kane zgjedhur ta kalojnë në heshtje totale./CNA.al