Hetimi i “21 Janarit”/ Avokati Matlija: Ka pasur mangësi

27 Maj 2021, 21:01, Aktualitet CNA

Prokuroria e Tiranës ka rihapur hetimet për çështjen e ?21 janarit?, në mënyrë specifike për vrasjen e Aleks Nikës, e cila ende ka mbetur pa autor. Hetimet janë rihapur pas kërkesës së Policisë së Tiranës në përvjetorin e 10-të të tragjedisë.

Avokati Dorian Matlija e konsideron hapin e prokurorisë ?thjesht një fillesë? pasi ende nuk dihet se çfarë hapash do të ndiqen nga organi i akuzës. Z. Matlija nënvizoi se familjarët janë ankuar deri në Strasburg duke pretenduar se nuk është bërë një hetim i gjithanshëm dhe i plotë dhe shteti shqiptar ka marrë përsipër të rihapë çështjen.

?Ka pasur dy marrëveshje të shtetit shqiptar me personat (familjarët) që janë ankuar në Strasburg që shteti shqiptar merrte përsipër që të rihapte ato pjesë që mundeshin për të zbuluar rrethana të reja. Deri tani kemi shprehje të vullnetit por nuk dimë se sa mundësi objektive për të zbulua gjëra të reja?, deklaroi z. Matlija.

Sipas avokatit hetimi i deritanishëm ka treguar mangësi duke bërë që shumë gjëra të mbetet të paqarta për ngjarjen e rëndë të vitit 2011.

?Hetimi i deritanishëm ka qenë me shumë mangësi duke e çuar në një drejtim të gabuar dhe duke lënë shumë gjëra të paqarta për 21 janarin. Do të shikohet vullneti i prokurorisë nëse do të bashkëpunojë me familjarët e viktimave dhe ekspertë të ndryshëm. Ka mundësi për përgjegjësi. Është shumë e rëndësishme që të mos ketë ndikim të politikës në këtë hetim?, u shpreh avokati.

Vrasja e Aleks Nikës ishte pezulluar për shkak të mungesës së provave, ndërsa predha e dëmtuar që i mori jetën pritet të rieksportohet edhe në bazë të kërkesës së policisë, e cila shpreson se me përparimin e teknologjisë këto vite, laboratorë shkencor në vendet e BE-së mund të japin rezultate në funksion të zbulimit të autorit.

Për ?21 Janarin? janë dënuar ish-kreu i Gardës, Ndrea Prendi, me 1 vit burg dhe gardisti Agim Llupo, me 3 vite, për ?vrasje nga pakujdesia? të Faik Myrtajt dhe Ziver Veizit. Llupo u dyshua edhe për vrasjen e Hekuran Dedës, por akuza nuk u provua në gjykim, duke e lënë edhe këtë vrasje pa autor. Prendi dhe Llupo janë paditur edhe nga garda e republikës e cila i kërkon të paguajnë dëmshpërblimin për familjet e viktimave të 21 janarit, çështje që do të vijojë në Gjykatën Administrative pasi Gjykata e Lartë refuzoi rekursin e tyre./ Euronews Albania