E fundit!

15:45 Aktualitet

46 ditë protestë/ Mbahet sot tubimi i radhës kundër qeverisë

Pasditen e sotme në Tiranë para Kryeministrisë mbahet prot...

Paguante taksë për tokë arë për pallatin e ndërtuar në 2006/ Fiks Fare zgjidh problemin

14 Maj 2021, 19:11, Denoncim CNA

Fiks Fare zgjidhi problemin disa mujor të një qytetari të Tiranës, i cili endej në zyrat shtetërore pa marrë zgjidhje. Fatmir Cali tha për emisionin investigativ se ka pasur një pronë prej 400 metër katrorë në zonën e Freskut në Tiranë. Në vitin 2006, pronën ia ka dhënë një firmë ndërtimi, ku është bërë edhe një pallat në atë pronë.

?Kaluan disa vite dhe pa më lajmëruar mësoj se në emrin tim më vinin taksa për tokë arë prej 400 metër. Pikërisht e njëjta sipërfaqe që ishte dhënë për ndërtim. Taksat kanë ardhur nga Drejtoria e Taksave në Tiranë. Kam marrë prej tyre një letër dhe kam parë që taksat bashkë me kamatat kishin shkuar në 1 milionë e 600 mijë lekë? thotë Fatmiri. Më tej shton se ka shkuar te Tatimet e Bashkisë dhe i kanë thënë se, përveç taksës së tokës arë, i janë faturuar edhe taksa për dy dyqane me sipërfaqe të përgjithshme 100 metër katrorë prej disa vitesh, megjithëse ai ishte bërë pronar në vitin 2020.

?Pra, nga njëra anë më vijnë taksa për tokë arë dhe nga ana tjetër për dyqane. Por, edhe për dyqanet më kanë ardhur padrejtësisht. Unë dyqanet i kam marrë në pronësi në vitin 2020, kur edhe më kanë kaluar nga ndërtuesi. Ndërkohë, rezulton se më kanë ardhur taksa që në vitin 2016, kur kanë qenë në pronësi të ndërtuesit. Madje, në dosje rezulton se zyra e riskut e tatimeve ka ardhur te dyqanet dhe kanë bërë foto. Madje, pa më lajmëruar mua. Nëse kanë ardhur nga firma, taksat duhet të ishin vënë në emrin e firmës dhe jo timin? thotë Fatmiri.

Gazetarët e Fiks Fare, bashkë me denoncuesin, shkojnë te Drejtoria e Përgjithshme e Taksave dhe Tarifave Vendore të Bashkisë së Tiranës. Pyetjeve se çfarë taksash ka z.Cali, gazetarët mësojmë se pas shumë vitesh, më në fund ka pasur një letër-këmbim mes Bashkisë së Tiranës dhe Njësisë Administrative Dajt për të konfirmuar se toka arë 400 metër është në fakt trualli i pallatit shumëkatësh. Nga punonjëset e taksave, u mor premtimi se kjo çështje do të zgjidhet dhe kjo taksë e vendosur padrejtësisht do të zerohej. Ndërkohë, Fiksi u interesua edhe për taksën e dyqaneve, ku mësoi se kjo drejtori do e ri verifikojë, pasi z.Cali është bërë pronar në vitin 2020.

Një ditë pas këtij premtimi, Drejtoria e Taksave dhe Tarifave në Bashkinë e Tiranës i zeroi taksat e z.Cali për tokën bujqësore. Ndërkohë, për njësinë e shërbimit, i zeroi taksat nga viti 2016 deri në vitin 2019. Sipas saj, qytetari do të paguajë vetëm taksat pas tetorit të vitit 2020, kur edhe është bërë pronar i dy dyqaneve. ?Edhe taksa e dyqaneve u hoq, për shkak se ishte vendosur në mënyrë të padrejtë. Faleminderit ?Fiks Fare?, u sorollata për disa muaj, ju ma zgjidhet për pak kohë? përfundoi Fatmiri./Tch