Galdini njeh zgjedhjet e 25 Prillit/ Flet për votat e pavlefshme

7 Maj 2021, 10:36, Politikë CNA

Kreu i LRE, Arian Galdini ka ritheksuar se e ka mbyllur kapitullin e zgjedhjeve të 25 Prillit, duke pranuar rezultatin.

Gladini pranon edhe dështimin, por tregon se votat janë deformuar dhe janë vjedhur. Sipas tij, 3 partitë PD, PS dhe LSI kanë futur duart tek votat e shqiptarëve, duke i nxjerrë ato të pavlefshme.

Deklarata e plotë e Arian Galdinit

Rezultati Kirurgjikal i Zgjedhjeve të 25 prillit! Po ritheksoj që në krye të herës se unë dhe LRE e kemi mbyllur kapitullin e zgjedhjeve të 25 prillit. Si LRE kemi pranuar rezultatin. Ndërsa unë si Kryetar i LRE dhe si Arian Galdini kam pranuar edhe dështimin. Sidoqoftë, unë nuk mund të hesht…

Sot ndërsa ngjisja shkallët e pallatit ku banojnë prindërit e mi, më ndal mësuesi i nderuar Beni që banon në katin e 4. Gati me lot në sy, më tha: A mundet të të përqafoj?

Unë e pashë pak vëngër dhe i përgjigjem: Ka ardhur koha që përqafimin (puthjen) e Judës ta quajmë përqafimi i Tom Doshistëve… Mësues Beni mbeti i shtangur e më tha: Përse ma thua këtë Arian? Mua më vjen turp që shumë nga pallati ynë u shitën dhe votuan Don Kleon (Xhepistin dhe Hajdutin e të fortin e lagjes)… Më vjen turp që kemi një jetë që jetojmë me shumicën e këtyre njerëzve këtu në këtë pallat, e pjesa më e madhe prej tyre votuan Don Kleon dhe partinë e Tom Doshit. Por unë dhe familja ime kemi votuar për Dinjitetin. Ne kemi votuar Nr 8. Ne kemi votuar Arian Galdinin dhe LRE. E jo vetëm ne por edhe disa intelektualë të tjerë në këtë lagje…

Atëherë i kërkova ndjesë mësues Benit dhe e përqafova. Në cilën qendër votimi ke votuar ti Beni bashkë me familjen tënde? – e pyeta mësues Benin. Tek qendra 18761 – më tha…

Hyra dhe e hapa online. Aty kam votuar unë, ime shoqe, babai dhe nëna ime, mësues Beni dhe familja e tij dhe 2 familje të tjera. Pra si rregull duhet të ishin 12 deri 14 vota për LRE. Por në faqen zyrtare të KQZ del vetëm 1 votë. Nuk del as vota ime, as e gruas sime, as e babait tim, as e mamasë sime….

Ku shkuan 13 vota ose 11 vota të tjera? Ku shkuan? Kjo bisedë e ky mendim më shtyu të flas me disa miq që janë miq të vjetër të cilët kanë qenë të përfshirë në proçes si Komisionerë e Numërues të Partive të Mëdha…U kërkova të më thonë të vërtetën…Thjesht më thoni të vërtetën u thashë…

Nuk ju dekonspiroj, nuk e kthej në kazus, por dua të di të vërtetën…Disa prej tyre heshtën… Por të tjerë më pohuan se shumë vota për Nr 8 ngado në Tiranë janë shpallur të pavlefshme, pasi çuditërisht u ka dalë nga një kryq tjetër që i ka nxjerrë të pavlefshme…Këtu u ndala e nisa të mendoj…

Mbi 80 mijë vota të pavlefshme, janë ndoshta tregues i një operacioni kirurgjikal që 3 Partitë (PS , PD, LSI) që kishin duart në Proçesin e Administrimit dhe Numërimit të votave, e kanë kryer me gjak të ftohtë prej vrasësish ndaj të resë…O e kanë bërë të treja partitë bashkë, ose ndryshe nuk do bëhej dot kaq preçiz ky operacion kirurgjikal…

E kanë bërë vrasjen kirurgjikale së bashku, të treja partitë… Janë kujdesur ti dështojnë e poshtërojnë të gjitha partitë e reja…Jo sepse kanë dashur të shuajnë ndokënd në veçanti, por sepse kanë dashur të vrasin që në gjenezë idenë e mundësisë së një lindjeje të re…Sepse 3 partitë e Rregjimit, duan dominimin edhe për 30 vitet e ardhshme..Pikërisht për këtë arsye, ne si LRE duhet të ndihemi më të vendosur se kurrë. E reja ka lindur në Shqipëri…Ka lindur e vockël fare dhe është në inkubator, por ka lindur tashmë…Ka lindur dhe do rritet se sbën. Pikë./ CNA.al