web counter
LEXO PA REKLAMA!

SHKARKO APP

App Store
Google Play

Përmbysje me forcë karakteri, Skënderbeu i Memellit beson te mbijetesa

29 Prill 2021, 17:42, Sport CNA

Kur Migen Memelli mori drejtimin e Skënderbeut, shumëkush e konsideroi një mision të pashpresë, më tepër një aventurë e trajnerit të ri për t?u afirmuar në Superiore, edhe pse në drejtimin e një skuadre që dukej se e kishte marrë rrugëtimin drejt rënies.

Sot, Skënderbeu i tij, dhe kjo mund të thuhet me plot gojën, është vetëm 3 pikë larg vendit të tetë që siguron Play out-in dhe nëse ia dalin do të ishte vërtet një mrekulli sportive. Një prove e jashtëzakonshme dhe shumëplanëshe ishte ajo ndaj Bylis.

Mallakastriotët janë një skuadër eksperte në duelet direkte, në ato ndeshje që ngjasojnë me një eliminim të drejtpërdrejtë, por këtë herë u mposhtën, padyshim për meritë të një Skënderbeu që mori maksimumin duke shpalosur vlerat si në aspektin sportiv ashtu edhe në atë të shpirtit të garës.

Nuk është e lehtë të kthehesh pas një goli të pësuar në një ndeshje të tillë, por forca e reagimit të Skënderbeut ishte impresionuese, dy gola brenda dy minutash, aftësi e një skuadre që ka brumin dhe shpirtin.

Forcë karakteri, pastaj pjesa e dytë është pasqyra e një tjetër fytyre, asaj të pjekurisë dhe aftësisë për të menaxhuar, për 45 minuta mbajtën nën kontroll Bylisin duke mos lejuar të rrezikohej seriozisht për asnjë moment porta, edhe kjo është një meritë më vete.

Ata tani kanë të drejtë të besojnë më shumë se kurrë, por megjithatë me vetëdijen se ende asgjë nuk është arritur, për të kompletuar mrekullinë janë në lojë edhe 6 finale, nëse luhen si ajo ndaj Bylisi, me siguri që do të vijë.





Lajmet e fundit nga