Basha një humbës serial/ Justifikohet për dështimin e rradhës

26 Prill 2021, 13:02, Politikë CNA

Sot Lulzim Basha ka dalë para mediave duke theksuar se fitorja e ndryshimit është e qartë, ai paska fituar dhe Partia Demokratike gjithashtu. Në fakt, nga të gjitha fjalët e thëna e vërteta është vetëm një: Po PD ka një rritje, por nuk është fituese, por një humbëse e zgjedhjeve.

Lulzim Basha nuk ka kurajon që të pranojë humbjen, pasi më parë kishte shpallur fitoren dhe qartazi duket dhe ka zgjedhur të njëjtën strategji të vitit 2017, atëherë kur masakroi demokratët me torturën në çadrën e famshme, duke i tradhtuar në një aleancë me Edi Ramën, më pas duke e përçarë PD dhe duke u rizgjedhur dhunshëm me ngrirje kryetari i PD-së.

Lulzim Basha, sot po tregon edhe një herë se është një humbës serial, por që nuk pranon të vërtetën në sytë e demokratëve, të cilëve u ka dhënë një faturë të madhe me veprimet dhe mosveprimet e tij, që nga djegia e mandateve të deputetëve, bojkoti i zgjedhjeve lokale, votimi kundër ndaj kandidatëve që do zgjidheshin për deputetë duke përballur trupën elektorale të Partisë Demokratike dhe përfaqësuesit e saj, më pas në një komision formal e deri në pazaret për bërjen e listave të kandidatëve për deputetë, ku pati edhe akuza për shitjen e tyre, sërish si në vitin 2017.

Gjithsesi, qartazi kutitë po tregojnë se Lulzim Basha ka humbur. Ai po përpiqet të justifikohet se janë hapur kutitë ku kryesisht votohet pro qeverisë. Por as kutitë e hapura në Korçë nuk janë ato që mbështesin qeverinë, as kutitë e hapura në Tiranë apo në Shkodër, Lezhë dhe Dibër ato në Vlorë e Fier, Berat dhe Durrës e kudo tjetër ka një rritje dhe kjo është e pranuar të PD-së, por një kryetar partie nuk garon për të rritur partinë nga zgjedhjet e kaluara, por garon për të fituar.

Demokratët sot ndihen të zhgënjyer, të humbur, ndihen të lënë në rrugë sepse Lulzim Basha me strategjitë e tij ka dështuar dhe ka humbur. Lulzim Basha thotë se ka fituar. Ai mund të ketë fituar disa vota më shumë sesa viti 2017, apo edhe mandate më shumë sesa viti 2017, por janë votat që i ikën PD në vitin 2013 dhe 2017. Lulzim Basha ishte për tetë vite kryetar i partisë dhe duhet të punonte për të fituar në zgjedhje dhe jo të humbiste.

Duhet që Lulzim Basha të ishte bërë kryeministër. Ai nuk është as kryeministër dhe as nuk ka fituar. Ai është humbës dhe tashmë turpësisht për të disatën herë nga zgjedhjet e 2015, në të 2017 ato të 2019 dhe sot në 2021 ai ka regjistruar humbje dhe vetëm humbje, pa i faturuar këtu edhe pasoja të tjera elektorale që po sjellin një mpakje të PD-së.

E në rast se Lulzim Basha nuk do e pranojë humbjen, nuk do e jap dorëheqjen kjo do të ishte një tallje dhe fyerje publike që i bëhet për të disatën herë rradhzi demokratëve. A duhet të pranojnë më demokratët që njeriu që i çoi nga humbja në humbje të tallet me ta ende? Dhe është koha për të reaguar sepse nesër do të jetë vonë dhe për karrigen e Lulzim Bashës rrezikohet ekzistenca e Partisë Demokratike./CNA.al