Daja këmbëngul te e tija: Hasani nuk është gati për të luajtur titullar

16 Prill 2021, 10:48, Sport CNA

Trajneri i Partizanit, Ilir Daja, shpreson që skuadra e tij të përsëritë ndeshjen që ka bërë ndaj Bylisit në fundjavën e kaluar, për të vazhduar serinë e rezultateve që duhen në rrugën drejt titullit kampion. Në konferencën para ndeshjes me Kastriotin, ai shpjegoi se priste nga skuadra që të bënte të njëjtën lojë imponuese ndërsa konfirmoi se Ferhan Hasani do të vazhdonte të niste ndeshjen nga stoli derisa të kishte formën më të mirë të mundshme fizike.

Gjendja e skuadrës ? ?Mala bashkë me gjithë kontingjentin është në dispozicion, duke shpresuar që edhe në stërvitjen e fundit të mos ndodhë gjë. Kështu që nesër ndaj Kastriotit kemi të gjithë kontingjentin në dispozicion?.

Shpërdorimi i rasteve para portës ? ?Me Bylisin kemi qenë në lartësinë e duhur në të gjithë komponentët. Ajo që ka qenë e dukshme në këtë ndeshje në raport me të tjerat është që ekipi ka bashkëpunuar në grup e kanë qenë altruistë. Kjo ka të bëjë me përgjegjësinë që kanë lojtarët për të marrë rezultatin. Kemi pasur si pozitive që kanë shkuar te goli të tre sulmuesit që kishim në start. Besoj që të njëjtën frymë, mënyrë loje e bashkëpunimi duhet të kemi edhe ndaj Kastriotit që të shkojmë te fitorja?.

Sfida me Kastriotin ? ?Në tre përballje me Kastriotin kemi 2 fitore dhe një humbje në start. Ndeshjet nuk janë të lehta dhe po shoh klasifikimin e golat e shënuar dhe Kastrioti në 5-shen e fundit është skuadra me më pak gola të shënuar se ekipet tjera. Ne na del për detyrë të mos e ulim dozën e motivimit se në përballje me ekipe edhe më poshtë kemi pasur probleme,e nuk mendojmë se kemi ndeshje të lehtë, por ndoshta shumë të vështirë se edhe ata kërkojnë pikë të sigurojnë mesin e artë në përfundim të kampionatit. Por mendoj se duhet të jemi ne ata që drejtojnë lojën me Kastriotin, të imponohemi dhe të bëjmë as më pak e as më shumë atë që bëmë ndaj Bylisit?.

Aktivizimi i Hasanit ? ?Një nga parimet e stërvitshmërisë është vazhdimësia. Hasani është vlerë në ekipin tonë, por do të jetë titullar në momentin kur mendojmë që është në gjendjen fizike që të mbulojë më shumë se 2/3 e lojës, gjë që për momentin besoj nuk e disponon. Përtej kësaj nuk mund të bëjmë asnjë hap fals duke provuar për të ndryshuar qoftë edhe për Hasanin. Ndaj do të japë kontributin e tij shumë të vlefshëm për aq minuta sa disponon gjendjen fizike në momentin që flasim?.