E fundit!

11:37 Kronika

Ishte në të njëjtën qeli me të birin/ Ndërron jetë i paraburgosuri në Shkodër

Një i paraburgosur në burgun e Shkodrës ka ndërruar jetë n...

Te Vllaznia ndryshojnë objektiv, Djarmati: Nuk e rrezikojmë Europën

5 Mars 2021, 09:22, Sport CNA

Matko Djarmati e kishte parashikuar krizën e Vllaznisë, por kroati nuk e ka menduar se do të zgjaste kaq shumë. Tashmë shkodranët, nga një ekip që ishte i shkëputur në krye me 9 pikë nga ndjekësit, rrezikon të lërë jo vetëm vendin e parë, por edhe zonën europiane. Në një intervistë ekskluzive për ?Panorama Sport?, kroati që bën detyrën e drejtorit sportiv tregon për momentin e vështirë që po kalon skuadra, besimin që për kthesën në kampionat, si dhe prapaskenat me kontratat.

Matko, si e shpjegoni këtë rënie të skuadrës?

Të jem i sinqertë ishim të përgatitur që skuadra do të kishte një rënie të tillë, pasi nuk mund të nxjerrësh maksimumin nga ekipi në çdo ndeshje deri në fund. Skuadra iu përgjigj shumë mirë ideve tona, por nuk e kemi menduar se kriza do të ishte kaq e gjatë. Megjithatë, shpresojmë që në ndeshjet në vijim ta zgjidhim këtë problem. Vërtet nuk kemi marrë rezultate pozitive, por loja jonë nuk ka qenë kaq problematike. Në disa ndeshje mund të merrnim më tepër.

Për çfarë ju vjen më shumë keq nga humbja e fundit në Durrës? A mund të bënte më tepër ekipi?

Në Durrës vendosi një supergol i Dejvi Bregut, një lojtar që ka shumë cilësi. Natyrisht kemi gabuar, pasi për atë situatë ku ne pësuam, kemi punuar shumë në stërvitje. Për këtë na vjen më shumë keq, sepse trajneri ka aplikuar një situatë tipike gjatë përgatitjeve, por ja që na ndodhi. Teuta vërtet fitoi tri pikë, por absolutisht nuk e kemi merituar që të humbasim në Durrës. Me lojën që bëmë, kemi merituar të paktën barazimin. Në pjesën e dytë mendoj se kemi bërë një futboll sulmues dhe shumë agresiv, prandaj them se duhet të dilnim me pikë. Gjithsesi, tashmë duhet të vazhdojmë të shohim përpara.

Nga 9 pikë diferencë pak javë më parë, tani vetëm një pikë nga Teuta dhe Laçi, si dhe dy nga Partizani. I druheni faktit se me këtë ecuri mund të humbisni edhe Europën?

Nuk mendoj se e rrezikojmë Europën, pasi i kemi të gjitha mundësitë, qoftë prej kampionatit, ashtu edhe prej Kupës. Jemi në luftë për të dyja kompeticionet dhe sigurisht që kur ishim 9 pikë, ishte diçka e mirë, por e kam thënë edhe më parë se kemi qenë të sigurt se një ditë do të vinte që do të kishim rezultate jo pozitive. Sa më shpejt të dalim nga kjo krizë, aq më shpejt do të jemi aty ku ishim para 5 apo 6 javësh.

Fakti që klubi është në proces shitjeje të aksioneve, sa ka ndikuar në skuadër?

Procesi i shitjes nuk ka lidhje fare me formën e ekipit. Nuk kemi pse kërkojmë alibi, meqë klubi është drejt shitjes dhe ne jemi dobët në këto 5-6 javët e fundit. E kemi një shpjegim pse jemi në këtë formë, por mos kërko që të ta them, pasi është diçka që e mbajmë për veten tonë brenda klubit. Në të gjithë analizat që kemi bërë, kemi arritur në disa konkluzione, që unë besoj se do ta gjejmë zgjidhje për situatën. E përsëris, shitja e klubit nuk ka lidhje fare me rezultatet e ekipit apo formën e lojtarëve.