E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Plas në PS-në e Pogradecit: Nuk e duam Shalsin deputet

1 Mars 2021, 20:16, Politikë CNA

Eduart Shalsi, deputet i qarkut të Korçës dhe i zonës së Pogradecit, ka filluar të ketë probleme jo vetëm me elektoratin e zonës së tij, por edhe me strukturat socialiste.

Burime nga strukturat lokale të PS në Pogradec i thanë CNA.al se socialistët kanë refuzuar kandidaturën e Eduart Shalsit, për të rikandiduar në Pogradec.

Drejtuesit lokalë të kësaj partie ia kanë bërë të ditur kundërshtimin e tyre për rikandidimin e Eduart Shalsit gjatë kohës që po përgatiten listat kreut të socialistëve për qarkun, Niko Peleshi, si edhe kryeministrit Edi Rama.

Gjithashtu socialistët lokalë kanë vënë nën presion edhe kryebashkiakun e Pogradecit Ilir Xhakolli, të cilit i është kërkuar që të kundërshtojë emrin e Eduart Shalsit në takimin e ardhshëm që pritet të ketë kryetari i socialistëve Rama me drejtuesit lokalë, pra drejtuesit e pushtetit vendor dhe të partisë për të vendosur përfundimisht për listen e qarkut të Korçës.

Rama tha disa ditë më parë se do jenë drejtuesit e qarqeve ata që do të propozojnë emrat dhe më pas strukturat e partisë ata që do të vendosin, por mesa duket në Pogradec ka një problem, strukturat lokale refuzojnë Eduart Shalsin, deputetin aktual që për ta është një njeri inekzistent. Prej katër vitesh nuk është paraqitur asnjëherë në Pogradec, nuk ka zgjidhur asnjë hall dhe problem për banorët e për socialistët dhe është vetëm për turizëm apo kur kryeministri Rama shfaqet në qytetin liqenor.

Mesa duket kreu i qeverisë dhe drejtuesi i qarkut Niko Peleshi tashmë janë përballë strukturave të tyre lokale në Pogradec, për të zgjedhur midis përplasjes, pra për të kundërshtuar bazën e partisë në lidhje me Eduart Shalsin apo për të vendosur emrin e ministrit dhe një bashkëpunëtori të Edi Ramës në listë me forcë.

Gjithsesi, socialistët lokalë i thanë CNA.al se do të ketë hapa të tjera dhe përplasje që do të bëhen publike, por tashmë shumica e informacioneve janë mbajtur konfidenciale dhe është shpresuar që në rrugë zyrtare të komunikohet me kryeministrin nëpërmjet të deleguarve për t?i dhënë një zgjidhje këtij problemi.

Ata thanë për CNA.al se nuk do të pranojnë në asnjë mënyrë që Shalsi të jetë kandidat për Pogradecin, pasi ai ka dështuar dhe rikandidimi i tij do të sillte një humbje të turpshme në qytet, por edhe në zonat e fshatrat që Shalsi nuk ka shkelur kurrë.

Ata theksuan se Pogradeci nuk duhet të provokohet sërish, ashtu siç ndodhi me zgjedhjet në vitin 2015, ku vendosja e një kandidature nga LSI apo me forcë nga qendra, solli humbjen e bashkisë së Pogradecit, prandaj dhe rikandidimi i Shalsit do të ishte e njejta situatë dhe do të sillte një disfatë të turpshme elektorale në zgjedhjet e 25 prillit.

Ndaj dhe socialistët pretendojnë se me një emër tjetër dhe me një kandidaturë të mirëmenduar, do të kishte një tjetër qasje të qytetarëve pogradecarë në mbështetje të socialistëve dhe të vetë kryeministrit Rama./ CNA.al