Kategoria e Parë/ Gafa arbitrash dhe shkarkime, java e 9-të mbyllet me çudira

26 Dhjetor 2020, 14:51, Sport CNA

Java e 9-të mund të quhet edhe ajo e arbitrave. Penallti të dhëna e të padhëna i kanë vendosur ?xhaketat e zeza? nën akuzë. Nëse 11-metërshi që vendosi Dinamo-Korabi ishte tepër bujare, në Oriku-Burreli ndodhi një masakër e vërtetë. Katër ndërhyrje në zonë në dëm të vendësve, por kryesori Elton Hazizaj nuk pa asnjë faull.

Dinamo dhe Egnatia mund të quhen pa frikë superfuqitë e të dyja grupeve, ndërsa skuadrat e tjera dëshmuan në një fazë të tërë që kanë luhatje të mëdha dhe duhet të mendojnë seriozisht që të ndryshojë diçka në merkaton e dimrit. Në 7 ndeshjet e luajtura në mbyllje të këtij viti kalendarik, u prodhuan tension e sherre, 17 gola, 39 të verdhë dhe 1 i kuq.

Në Veri ?gara? vazhdon të jetë edhe më e ashpër, por Dinamo tregoi se ka tjetër nivel. Është pa dyshim ekipi që ka treguar më shumë stabilitet. Asnjë humbje në 8 ndeshje dhe vetëm një gol i pësuar, dëshmojnë se kryeqytetasit janë në rrugën e duhur. U mjaftuan vetëm me një penallti për të ruajtur kreun në fund të 2020-ës, përballë një Korabi që e bëri realisht të vuajë.

Skuadra e Klevis Dalipit bëri vërtet mirë, por në fund të fundit dolën duarbosh. Burreli në anën tjetër ka harruar të fitojë, teksa ngeci edhe me Orikumin. Një ndeshje që në fakt edhe mund ta kishin humbur, nëse arbitri do të jepte ndonjë penallti në favor të bregdetarëve. Besëlidhja e sheh veten 8 pikë larg kreut, duke iu larguar objektivit madhor që i kanë vënë vetes. Edhe pse ishin në avantazh, mendoi Pelinku t?ua prishte festën në ?Reshit Rusi?. Vora mundi Partizanin B, duke iu larguar zonës së ftohtë. Dhe tashmë në fund të Grupit A është Erzeni, që e mbylli fazë para kohe.

Në Jug pati goleada. Besa kaloi lehtësisht Elbasanin dhe tashmë e është e dyta në Grupin B. Verdheblutë janë vërtet katastrofë, pasi nuk kanë asnjë pikë deri më tani dhe e çojnë kolonën e golave të pësuar në 20. Një shifër e frikshme, që paralajmëron edhe rënien. Nëse ?pokeri? i kavajasve nuk përbën habi, të njëjtën gjë nuk mund të themi për atë të Turbinës. Mundi as më pak e as më shumë se Pogradecin, që vinte nga tri fitore radhazi dhe tashmë ngujohet në vendin e 6-të.

Çudia ndodh me cërrikasit që jo vetëm fituan 4-1 me një pretendente, por kanë zyrtarisht 5 javë radhazi që nuk e njohin humbjen. Drejtuesit shkarkojnë trajnerin Marcelo Troisin për mungesë rezultatesh, në një kohë që shifrat thonë të kundërtën. Egnatia kthehet te fitoret pas dy javëve mungesë, duke kaluar pikërisht Tomorin. Një ndeshje e luftuar, që u vendos vetëm pas minutës së 80-të. Xhekson e më pas Shtubina likuiduan beratasit dhe blinduan vendin e parë në fund të kësaj faze.