Festat e fundivitit/ Prezantohen masat e reja, kufizohet lëvizja e njerëzve

21 Dhjetor 2020, 13:50, Aktualitet CNA

Me afrimin e festave të fundvitit Ministria e Shëndetësisë në bashkëpunim me Komitetin e Ekspertëve kanë marë disa masa të reja kufizuese për parandalimin e përhapjes së Covid.

Ministrja e Shëndetësisë Ogerta Manastirliu u shpreh se nga data 24 dhjetor deri në datën 4 janar lëvizja do të kufizohet nga ora 20:30 deri në orën 06:00.

Ministrja theksoi se përjashtim nga këto masa do të kenë emergjencat mjekësore dhe ata që lëvizin për punë, të cilët duhet të pajisen me autorizim nga e-Albania.

E njëjta procedurë do të ndiqet edhe për baret dhe restorantet, të cilat gjatë kësaj periudhe do të mbyllen që në orën 20:30.

Ndërsa në datën 5 janar do të rikthehen masat që janë aktualisht, ku lëvizja e qytetarëve dhe automjeteve do të kufizohen nga ora 22:00 deri në orën 06:00.

“Nga vlerësimi i kryer në baza dinamike, rezulton një incidencë 359 raste për 100 mijë banorë. Situata ka paraqitur një qendrueshmëri sa i takon rasteve, përqindja e shtretërve të zënë është 63% për spitalet Covid, dhe në rang vendi pak më shumë se 20%. Kanë pasur impakt masat që janë marrë derimë tani, por meriton që të vlerësohet në mënyrë dinamike.

Puna në terren po vijon, jemi në gadishmëri të plotë, vijon testimi gjurmimi i rasteve që janë zbuluar, ka nisur testimi i shpejtë dhe në 6 pika në Tiranë, si dhe në të gjitha qytetet e tjera, në spitalet rajonale dhe në shërbimet e urgjencave. Duke qenë se kemi hyrë në periudhën e festave kemi marrë disa vendime:

Kufizime nga ora 20 e 30 deri në 6, duke nisur nga data 24 Dhjetor deri në 4 Janar. Prej datës 5 Janar kufizimi rikthehet në orën 22:00. Kufizimi i aktiviteteve të vareve dhe restoranteve fastfood dhe bareve duke filluar nga ora 20 e 30 deri në 6 të mëngjesit.

Qytetarët të shmangin udhëtimet e panevojshme”, tha Manastirliu./CNA.al