Mjekët po vdesin, shteti bën sehir!/ Erion Dasho: Nuk nisen heronjtë për “luftë” me pushkë me gjalm...

15 Dhjetor 2020, 09:32, Lifestyle CNA

Mjeku i njohur epidemiolog, Erion Dasho ka reaguar sërish në rrjetet sociale, lidhur me situatën e pandemisë në vendin tonë.

Duke ju referuar numri të lartë të vdekjeve në rradhët e mjekëve, Dasho shtron disa pyetje për Ministrinë e Shëndetësisë, ndërsa kritikon nisjen e tyre për ?luftë? me pushkë me gjalm.

Vdekjet midis mjekëve që po raportohen me një rregullsi të frikshme nuk mund të kalohen me statuset e pikëlluara të familjarëve, kolegëve dhe pacientëve që shpesh u detyrojnë jetën apo shëndetin mjekëve të ndjerë!

Aq më tepër, nuk mund të kalohen këto vdekje me statuset e ministrisë apo ministres së shëndetësisë (?nderim? të cilin çuditërisht jo të gjithë mjekët e kanë ?merituar?).

Këto vdekje shtrojnë disa pyetje të cilat kanë qarkulluar prej kohësh dhe tashmë kur numri i humbjeve të jetëve midis kolegëve po kap 30-ën kërkojnë përgjigje të menjëhershme:

– A është marrë ndonjëherë seriozisht nga ministria mbrojtja në punë e mjekëve?

– A është kuptuar më në fund se parandalimi i transmetimit të COVID në spitale dhe qendra shëndetësore është detyrim i shtetit pasi mbron si mjekët ashtu edhe pacientët?

– A ka ndonjë shans që edhe Shqipëria të ketë si gjithë bota e qytetëruar institucione shëndetësore të sigurt lidhur me COVID?

– A është e vërtetë se maskat, aq të domosdoshme në mjediset ku ofrohet kujdes shëndetësor, jepen akoma me pikatore?

– A ka ndonjë plan ministria të nisë testimin e rregullt të personelit mjeksor, sidomos tani kur erdhën edhe testet e shpejta antigjenike?

– A i ofrohet falas testi i shpejtë i antitrupave kolegëve apo duhet të paguajnë nga xhepi 4 mijë lekë në sektorin privat (kosto e testit është më pak se 5 euro)?

– A është menduar për të shumëpërfolurin sigurim të jetës së mjekëve?

– A është menduar për një dëmshpërblim financiar dhe më pas pension special për familjet e mjekëve që humbën jetën në detyrë?

Përgjigjet për këto pyetje dhe, mbi të gjitha, marrja e masave reflektuese ndaj tyre është detyrim!

Përndryshe mos i quani më mjekët ?heronj?!

“Heronjtë” nuk nisen për ?luftë? me pushkë me gjalm…