web counter
LEXO PA REKLAMA!

SHKARKO APP

App Store
Google Play

Trump i dërgon letër Ramës/ Ja çfarë shkruan presidenti amerikan

2 Tetor 2020, 06:14, Politikë CNA

Presidenti i SHBA, Donald Trump i ka dërguar një letër kryeministrit Rama, ku i shpreh mirënjohjen për mbështetjen e shtetit shqiptar në disa marrëveshje ndërkombëtare.

Lajmi është bërë i ditur nga vetë kreu i qeverisë, Edi Rama, i cili në një postim në rrjetet sociale, ka shpërndarë letrën e Trump.

Në letrën drejtuar Ramës, Trump e falenderon kryeministrin shqiptar për lidershipin në Ballkan dhe në Europë për ekspozimin e ndikimit të Kinës për ato që Trump i quan abuzime me të drejtat e njeriut.

Kreu i Shtëpisë së Bardhë e nxit kryeministrin shqiptar që të largohet nga marrëveshja e Kinës të formatit “17 + 1” dhe të angazhohet më shumë në marrëveshjen e iniciuar nga administrata amerikane në nismën e “Tre deteve”.

Postimi i plotë:

Mirëmëngjes dhe me këtë letër që mora mbrëmë nga Presidenti i Shteteve të Bashkuara, ju uroj një ditë të mbarë

I dashur Z. Kryeministër:

Në emër të Shteteve të Bashkuara të Amerikës, unë dua t’ju falënderoj juve për lidershipin e Shqipërisë në rajonin e Ballkanit dhe nëpër Europë, për ekspozimin e ndikimit malinj të Kinës, abuzimet me të drejtat e njeriut dhe praktikat grabitqare të huazimit. Mbështetja juaj e hapur për rrjetet e sigurta të telekomunikacionit po jep një shembull të fortë dhe shpresoj që Shtetet e Bashkuara dhe Shqipëria të mund të nënshkruajnë së shpejti një Memorandum Mirëkuptimi mbi sigurinë 5G, i cili hap rrugën që edhe vendet e tjera në Ballkan të bëjnë të njëjtën gjë. Jam gjithashtu i kënaqur nga roli i fortë i Shqipërisë në Nismën e Tre Deteve – një alternativë transparente, e bazuar në treg dhe e drejtë, e formatit Kina 17 + 1 prej të cilit unë ju nxis të dilni.

Unë dua t’ju falënderoj që e keni mbështetur normalizimin ekonomik midis Serbisë dhe Kosovës dhe për mbështetjen tuaj të fuqishme të Marrëveshjeve të Abrahamit, hapi më domethënës drejt paqes në Lindjen e Mesme për këtë gjeneratë. Ju inkurajoj që t’u bashkoheni Shteteve të Bashkuara dhe të tjera kombeve evropiane në zhvendosjen e ambasadës suaj në Jeruzalem.





Lajmet e fundit nga