web counter
LEXO PA REKLAMA!

SHKARKO APP

App Store
Google Play

E fundit!

x

Shifrat përtej pandemisë/ Më pak vdekje edhe në tremujorin e dytë

12 Gusht 2020, 11:45, Aktualitet CNA

Statistikat e INSTAT edhe për tremujorin e dytë treguan se epidemia e Covid-19 nuk ka sjellë rritje në numrin e përgjithshëm të vdekjeve në Shqipëri. Për të dytin tremujor radhazi, numri i vdekjeve u raportua në rënie, me 3.1% më pak krahasuar me të njëjtën periudhë të vitit të kaluar.

Megjithatë, edhe këtë tremujor INSTAT thekson se, për shkak të kufizimeve që u shtrinë edhe në tremujorin e dytë, është e mundur që raportimet e vdekjeve në zyrat e gjendjes civile të mos jenë bërë në kohë, ndaj shifrat do të jenë objekt rishikimi. Një rezervë të ngjashme Instat e pati shprehur edhe në tremujorin e parë, por, zyrtarisht shifrat e vdekjeve nuk kanë pasur ndonjë rishikim.

Për gjysmën e parë të vitit në Shqipëri janë regjistruar rreth 11 100 mijë vdekje, 3.5% më pak krahasuar me një vit më parë. Deri tani, Covid-19 iu ka marrë jetën zyrtarisht të paktën 200 shqiptarëve dhe shifrat janë në rritje ditë pas dite.

Ulja e numrit të vdekjeve e ka përmirësuar përkohësisht rritjen natyrore të popullsisë dhe numri i lindjeve e tejkaloi me 1135 numrin e vdekjeve. Sidoqoftë, edhe në tremujorin e dytë pesë qarqe regjistruan vlera negative të shtesës natyrore të popullsisë, çka do të thotë se në to u regjistruan më shumë vdekje sesa lindje. Vlora, Korça, Gjirokastra, Berati dhe Shkodra pësuan tkurrje natyrore të popullsisë.

Në themel të kësaj tendence ngelet lindshmëria e ulët. Për tremujorin e dytë të këtij viti numri i lindjeve ra me 8% krahasuar me të njëjtën periudhë të vitit të shkuar. Me përjashtim të Lezhës, të gjithë qarqet e tjerë të vendit raportuan një ulje të numrit të lindjeve krahasuar me vitin e kaluar.

Rënia e lindjeve është një tendencë që nuk po frenohet, pavarëisht përpjekjeve për t?i nxitur duke rritur bonuset. Rënia e lindjeve, kompnuar me vijimësinë e emigracionit, po e tkurr dhe po e plak gradualisht popullsinë e Shqipërisë. /CNA.al





Lajmet e fundit nga