web counter
LEXO PA REKLAMA!

SHKARKO APP

App Store
Google Play

E fundit!

x

Daja: Skënderbeu nuk ka bërë kurrë kompromise, ja e ardhmja ime

24 Korrik 2020, 07:28, Sport CNA

Skënderbeu do të kërkojë të marrë mak simumin sot në orën 20:45 në ?Elbasan Arena? ndaj Kukësit të vendit të dytë. Korçarët kanë ende shpresa matematikore për një vend në Europë, edhe pse mund të mos mjaftojnë as dy fitore në rast se Teuta rivale bën mirë në ndeshjet e mbetura. Trajneri i Skënderbeut, Ilir Daja, në një intervistë të dhënë për ?Panorama Sport?, flet për ndeshjen e radhës dhe beson ende tek objektivi europian.

Sipas tij, gjithçka tani është llogari me laps e letër. Trajneri sqaron edhe një herë të ardhmen, duke theksuar se çdo gjë varet nga vendimi që do të merret për klubin në Gjykatën Federale.

Si shkon Skënderbeu në ndeshjen ndaj Kukësit?
Mund të themi se deri diku jemi të plotë. Kemi rikthimin e rëndësishëm të Elezit dhe Imamit, që kanë kaluar problemet fizike. Na mungon Mara për shkak kartonësh. Kjo do të jetë gjendja jonë në ndeshjen e radhës ndaj Kukësit. Ekipi ka qenë i motivuar gjatë kësaj jave dhe i përqendruar për të bërë mirë në këtë takim.

Fakti që Kukësi nuk është më në garë për titull, do të jetë një plus për ju?
Kukësi është një ekip me shumë elementë cilësorë dhe kjo flet për forcën e këtij ekipi. Mund të them se është diçka që ka dy anët e medaljes. Nga një anë, mund të jenë jo të motivuar në maksimum, pasi nuk kanë objektiv. Por nga ana tjetër, janë të rrezikuar për të humbur vendin e dytë dhe duke qenë se nuk kanë presionin e rezultatit, mund të shprehen më lirshëm në fushë. Kjo është situata në nivel paragjykimi, pasi gjithçka do të shihet në fushë. Unë shpresoj dhe kërkoj nga ekipi im që të japë më të mirën në fushë, pasi fitorja është rezultati që na bën punë për të mbajtur hapur objektivin.

Do të keni përballë Shehin. Një përballje speciale?
Nuk ka asgjë speciale, pasi nuk do të jetë një përballje mes Dajës dhe Shehit, por një ndeshje mes Skënderbeut dhe Kukësit. Janë ekipet ato që luajnë në fushë, e për rrjedhojë nuk ka asgjë të veçantë mes dy trajnerëve.

Në këtë pikë kur janë edhe dy javë në lojë, sa besoni tek arritja e zonës europiane?
Më duhet të besoj deri në fund, pasi është një objektiv që duam ta realizojmë. Jemi në një situatë kur çdo hap fals është pa kthim. Prandaj presim të bëjmë më të mirën dhe të shohim se si do të paraqiten edhe ekipet e tjera në ndeshjet e tyre.

U druheni kompromiseve të rivalëve në këtë fundkampionati?
Unë nuk dua të paragjykoj apo të jap parashikime si disa pseudoanalistë për çështje të tilla. Unë di të them vetëm kaq, se Skënderbeu asnjëherë nuk ka qenë i përfshirë në të tilla gjëra. Nuk ka pasur kurrë aleanca, as në këtë kampionat dhe as në kampionate të tjera. Gjithmonë Skënderbeu ka marrë atë që ka merituar dhe ka dhënë më të mirën e vet në fushë. Për të tjera gjëra që nuk kanë të bëjnë me ekipin tim, nuk dua të bëj komente.

Çfarë ju ka thënë klubi për të ardhmen?
Të gjithë në këto momente jemi të fokusuar te mbyllja e kampionatit, pasi duam të bëjmë mirë dhe të arrijmë objektivin. Mund të them se gjithçka mbetet e varur nga vendimi i Gjykatës Federale. Pas vendimit do të shihet më qartë se cili do të jetë plani i veprimit dhe strategjia e klubit në varësi të vendimit. Ne të gjithë shpresojmë dhe duam që Skënderbeu të dalë i pastër nga çështja që ka me UEFA-n, edhe për të mirën e futbollit shqiptar.





Lajmet e fundit nga