Të dashur ambasadorë, boll me negociata që dëmtojnë Shqipërinë

4 Qershor 2020, 13:30, Politikë CNA

A ju kujtohet viti 2016?

Kur nisi Reforma në Drejtësi!

Edhe atëherë njësoj si tani në ditën që hyri politika, draftet e Reformës në Drejtësi u mbushen me skema dhe formula bllokuese.

Frytet e asaj reforme po i shohim të gjithë.

Janë frute të hidhura të gjendjes pa Gjykatë Kushtetuese, pa Gjykatë të Lartë, me një sistem drejtësie të gjymtuar që ka mxitur vetëgjyqësinë në mungesë të shërbimit të drejtësisë.

Kujtoni pak puthjet entuziaste të ambasadorëve në llozhat e Kuvendit.

Të gjithë flisnin për dashurinë e tyre për Shqipërinë dhe popullin shqiptar.

A thua se po flisnin me indigjenë ishujsh të humbur të cilet mrekulloheshin me rrezet e diellit të reflektuara me copa pasqyrash të thyera.

Populli dëgjoi. Populli shpresoi. Populli priti. Populli sot nuk pret më asgjë.

Por po vëzhgon teatrin e rradhës së Reformes Zgjedhore.

Me administratorë rishtarë. Që nën shembullin e suksesit të të kaluarve, flasin të gjithe me fjali patetike për dashurinë për të njëjtët shqiptarë.

Ndërsa ulin në divanin e shtëpisë të njëjtët aktorë politikë që menderosen me fomula kompromisi Reformën në Drejtësi.

Të dashur ambasadorë!

Shqiptarët nuk janë lodhur vetëm me ata katër aktorët politik shqiptarë.

Kanë boll edhe nga ju.

Është e qartë që Shqipëria është shumë pak për Ju.

Askujt nuk i duhet Shqipëria si vendi i ëndrrave ku do kishte dashur të kishte lindur, rritur, martuar e trashëguar.

Askush nga Ju nuk e endërron këtë.

Ky vend është trampolina juaj për diku gjetkë.

Aty ku ëndërrat shumohen.

Por ju lutemi. Në emër të karrierës tuaj, bëni një hap pas.

Mund të jetë më mirë që në emër të kërcimit tuaj për larg, të mos e shndërrorrit trampolinën Shqiperi, si një dërrasë të thyer e shkërmoqur nga vrulli i shkëlqimit tuaj.

Lini pak platformë edhe për ata që vijnë pas jush.

Nëse nuk ndërtoni dot mos u bashkoni sot me Luli Bashën dhe ata që rrinë pas e anash tij në rrënimin e proçeseve zgjedhore.

Nëse nuk bëhet dot mirë, mbase është mirë të rrijë siç është.

Shqiptarët kanë një shprehje: “e keqja nuk ka fund”.

Mbase është koha që ju të bëni një hap pas e ta riktheni tekstin e ligjit të zgjedhjeve, aty ku ish përpara se Luli Basha të fuste formulat e veta të bllokimit të gjithçkaje për llogari të tre të tjerëve./ CNA.al