web counter
LEXO PA REKLAMA!

SHKARKO APP

App Store
Google Play

E fundit!

x

Gazment Bardhi publikon dokumentin/ "Qeveria hap tender sekret për blerjen e letrave higjenike"

25 Prill 2020, 11:50, Politikë CNA

Sekretari i Përgjithshëm i Partisë Demokratike Gazment Bardhi ka denoncuar me dokumenta tenderin sekret të qeverisë për blerjen e letrave higjenike.

Në një deklaratë për shtyp, Bardhi ngriti akuzat se qeveria ka blerë letra higjenike në shkelje flagrante të ligjit, ndërsa pretendon se në këtë mënyrë po vjedh lekët e shqiptarëve në kohë pandemie.

“Forma e re për të abuzuar me paratë e shqiptarëve në këtë kohë pandemie është klasifikimi sekret me firmën e tij të tenderave anti-COVID. Nuk u ngopën duke vjedhur me maskat për mjekët, me testimet për qytetarët, me respiratorët për më të goditurit nga virusi, pajsije që i kanë blerë deri në 4 fishin e çmimit të tregut, por janë vërsur deri aty ku nuk ia pret mendja askujt- tek letrat higjenike. Më dëgjuat shumë mirë. Kanë klasifikuar sekret blerjen e letrave higjenike për të sëmurët me COVID dhe stafin mjekësor.

Janë plot 10 tendera të rinj të zhvilluar në datë 18 Prill, që Qeveria i ka klasifikuar përsëri sekret. Është e paimagjinueshme që mes ketyre kontrateve sekrete janë dhe tenderat për blerjen e letrave higjenike me procedurë sekrete, letrat e duarve dhe kartopeceta. Jam i sigurtë që çdokush që po e dëgjon këtë tani nuk u beson veshëve. Por vendimi i qeverisë së Edi Ramës, i publikuar mbrëmë në fletoren zyrtare, nuk lë vend për asnjë hamendje.

Letrat higjenike për të sëmurët me COVID dhe stafin mjekësor që kujdeset për ta janë shpallur sekret. Mjerim më të madh për një qeveri nuk mund të ketë. Ka arritur deri aty sa një procedurë që përdoret për interesin thelbësor të shtetit, atë të sigurisë kombëtare, e përdor për të mbuluar, me siguri, vjedhjen e radhës me tenderin sekret të letrave higjenike.

Ky është treguesi më domethnës se deri ku shkon babëzia për të vjedhur paratë e shqptarëve, të cilët, për shkak të pandemisë dhe mungesës së ndihmës nga qeveria e letrave higjenike sekret, janë edhe më të dobët ekonomikisht. Kjo është një shkelje flagrante e ligjit. Le të dalë Edi Rama dhe të thotë ku është sekreti shtetëror tek tek fakti sa letra higjenike blen? Cili interesi thelbësor i shtetit cënohet, nëse bëhet publike kontrata për të blerë letrat higjenike për shembull? Nga transparenca dhe publikimi i këtyre procedurave cënohet vetëm një interes. Interesi i Edi Ramës dhe Qeverisë për të vazhduar vjedhjen e parave të shqiptarëve edhe në kohë pandemie”, u shpreh demokrati.

Sipas tij, arsyeja pse qeveria e ka fshehur tenderin janë çmimet stratosferike, abuzimi dhe korrupsioni, duke paguar qindra milionë lekë më shumë klientëve e tij në kohën më të vështirë për qytetarët.

Më tej, Bardhi i bëri thirrje Prokurorisë dhe SPAK të vënë përpara drejtësisë përgjegjësit e këtij tenderi që e quan sekret.

“Secili prej jush nuk po vuan vetëm nga virusi, siç po vuan në fakt e gjithë bota, por mbi të gjitha po vuani nga një Qeveri e korruptuar dhe një Kryeministër i dështuar. Në emër të Partisë Demokratike, i bëj edhe njëherë thirrje prokurorisë që të dalë nga karantina, ku e mban prej vitesh kjo Qeveri. SPAK ka mjaftueshëm fakte të çojë para drejtësisë hajdutët e qeverisë që pasurohen si të babëzitur, kur shëndeti, jeta dhe mirëqënia e qytetarëve janë në rrezik”, nënvizoi ai./ CNA.al





Lajmet e fundit nga