E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Nga Armir SHKURTI/ Dilema hamletjane për Metën

4 Mars 2020, 12:32, Politikë CNA

21 janar 2011: Rama në shesh proteston kundër Metës që është pjesë e qeverisë Berisha ndërsa Basha është Ministër i brendshëm. 4 protestues vriten. Të tjerë lëndohen.

2 mars 2020. Meta është presidenti i vënë nga Rama kryeministër pas marrëveshjes 14 majit 2017 me Bashën. Pra tani Meta del në shesh kundër një grushti shteti! Në shesh, si manifestues të thjeshtë, janë edhe ish kryeministri i 21 janarit, Sali Berisha bashkë me ish ministrin e brendshëm Lulzim Basha….
Më surreale se kjo skenë nuk gjen. Ndaj edhe pyetja më e vështirë por më e kuptimtë qe: “A duhet me dalë në një protestë që organizon Ilir Meta kundër Edi Ramës”?
Meta është pjesë e establishmentit. Kështu që asgjë nuk ndryshon në thelb, kushdo të jetë prej tyre në pushtet. Pra JO!

Por shpopullimi, varfërimi, falimentimi ekonomik që po zbaton Rama duhen ndalur me çdo mjet dhe nga kushdo që mundet. Pra PO!

Dy vjet pas protestës me 4 të vrarë Meta u bë aleat dhe bashkëqeverisi me Ramën. 4 vjet qe Kryetar Parlamenti dhe shumicën e ligjeve të Grushtit të Shtetit, ndryshimet në Kushtetutën që puth sot i ka vulosur vetë. Pra JO!

Ama që kemi një GRUSHT SHTETI këtë e kemi denoncuar prej vitesh, me kapjen e parlamentit, sistemit të drejtësisë dhe çdo pushteti në Shqipëri. Pra PO! Duhet dalë pa ngurim!
PO apo JO? A duhej (dhe a duhet) dalë në protestat që organizojnë KËTA?

Si edhe në rastin e pardjeshëm, ka plot gjasa që të ndjehesh i përdorur. Sidomos pas dëndjes me gaz të demokratëve në shëtitjet e vjetshmë Kryeministri – Kuvend, besimi ka humbur. Ndërsa për shkak të çka rendita më sipër, ka humbur krejt MORALI.

Kështu që, duke u kthyer tek pyetja: Duhet apo jo të dalë një shqiptar në manifestime a protesta organizuar nga të njejtët pokeristë të ESTABLISHMENTIT?
Parimisht qytetari del për problemet e veta. E hëna tregoi se kazani i këtyre halleve vlon më fort se katrani i Ferrit. Por kërkon UDHËHEQJE. Kriza(t) e tranzicionit zgjidhet me klasë dhe udhëheqje të re politike Ama për sa kohë që nuk ka dalë në ballë kjo udhëheqje a ka kuptim të rrimë në shtëpi e të presim të ndodhë vetvetiu ndryshimi?

Nuk pata qëllim të rrëfej udhën e drejtë, në duhet a jo dalë në protestë a në manifestimet e Ilir Metës. Mora shkas prej tij për të ilustruar lëmshin ku ndodhemi. Të gjithë heronj – të gjithë batakçilerë. Të gjithë profetë – të gjithë bixhozçinj, pokeristë që lenë në lodra vetëm pasurinë tonë. Jemi në kushtet e korrikut ’90, kur shqiptarët iknin me mijëra. Tani me qindramijë. Duhet të vijmë në dhjetor. Të dëbojmë Byronë, Frontin dhe gjithë levat e partisë. Këtë herë prej vërteti, gjithë klasën politike, të rilindur./ CNA.al