Dhuna fizike dhe seksuale/ Ministria e Arsimit bllokon urdhrin e punonjësve social

18 Shkurt 2020, 12:06, Aktualitet CNA

Përballë dhunës fizike dhe seksuale, Ministria e Arsimit nuk reagon me mekanizmat e saj mbi Rolin e Punonjësve Social!

Nën presionin e një situate gjithmonë e më në rritje të problematikave të shumta që hasin nxënësit dhe fëmijët në Shqipëri, roli i punonjësit social në mjediset e institucioneve arsimore apo dhe në ato të përkujdesit social të fëmijëve bëhet akoma më thelbësor!

Vetëm një javë më parë media solli rastin flagrant të dhunës seksuale të një mësuesi ndaj një vajze në Fier, ndërsa roli i punonjësve social si një profesion i rëndësishëm në trajtimin e rasteve të tilla, ende lihet në harresë!

Në një moment të tillë një grup profesionistësh të Punonjësve Socialë shprehin për të disatën herë shqetësimin e tyre mbi apatinë dhe shurdhërinë e institucionit që prej kohësh duhet të kishte zgjidhur këtë situatë. Ministria e Arsimit, Sportit dhe Rinisë edhe pse në arkivat e saj ka shumë kërkesa të punonjësve social mbi Ligjin ?Për Urdhrin e Punonjësve Social në Republikën e Shqipërisë?, sërish ky institucion jo vetëm hesht përballë këtyrë kërkesave por edhe nuk reagon me mekanizmat që i cakton ligji pwr tw zgjidhur këtë situatë.

Tre javë më parë, mbi 50 Punonjës Social i kërkuan zyrtarisht Ministres së Arsimit, Sportit dhe Rinisë znj. Besa Shahini një takim konsultues mbi mënyrat dhe qëndrueshmërinë e zbatimit të Ligjit Nr. 163/2014 ?Për Urdhrin e Punonjësve Social në Republikën e Shqipërisë?, si dhe hapat që duhet të ndërrmeren nga institucionet përkatëse dhe organizatat e shoqërisë civile për vënien në zbatim të menjëhershëm të Ligjit.

Ndërkohë paralelisht një tjetër Kërkesë i është drejtuar Komisionit të Edukimit dhe Mjeteve të Informimit Publik në Kuvendin e Shqipërisë për një seancë dëgjimore me znj. Shahini, pikërisht mbi funksionimin dhe vënien në zbatim të Ligjit Nr. 163/2014.

Në djeninë tonë, Ministria e Arsimit, Sportit dhe Rinisë ende nuk ka kthyer përgjigje as ndaj këtij Komisioni Parlamentar dhe as ndaj grupit të Punonjësve Socialë.

Kjo apati dhe kjo shurdhëri e Ministrisë së Arsimit shfaqet akoma më alarmante pikërisht në një moment ku mediat përcjellin me zë dhe me figurë pothuaj çdo javë raste flagrante të dhunës në të gjitha format e saj që përshfaqet në institucionet arsimore publike dhe jo vetëm në Shqipëri.

Përmes kësaj Deklarate Publike, grupi i Punonjësve Socialë i bën thirrje të përsëritur Ministres së Arsimit znj. Shahini të veprojë urgjentisht duke mos zvarritur procesin i cili që prej vitit 2014 është në ngërç institucional.

Ne do të kërkojmë sërish nga Komisioni i Edukimit dhe Mjeteve të Informimit Publik në Kuvend, të përdorë të gjithë mekanizmat e veta për të nxitur procesin për vënien në zbatim të Ligjit aq shumë të kërkuar në këtë situatë për Urdhrin e Punonjësve Social.

Së fundi ne kërkojmë nga Zyra e Koordinatorit për të Drejtën e Informimit në Ministrinë e Arsimit, Sportit dhe Rinisë, bazuar tek Ligji 119/2014 për të Drejtën e Informimit një informacion mbi masat që MASR po merr për vënien në zbatim të Ligjit Nr. 163/2014.