"Heqja e barrierave, urgjentisht e nevojshme"/ Majlinda Bregu jep mesazhin e fortë pas Samitit të Ohrit

10 Nëntor 2019, 15:51, Politikë CNA

“Këshilli i Bashkëpunimit Rajonal mbështet nismat që kontribuojnë në krijimin e një tregu të përbashkët për rajonin tonë”, kështu është shprehur Sekretarja e Përgjithshme e Këshillit të Bashkëpunimit Rajonal (RCC) Majlinda Bregu pas takimit të sotëm të liderëve të Ballkanit Perëndimor në Ohër.

Teksa deklaroi se një heqje e barrjerave midis vendeve brenda rajonit është tepër e nevojshme, Bregu thekson se nismat duhet të pasqyrojnë modelet e BE-së me qëllim që të ndihmojnë në rrugën e integrimit të vendeve drejt unionit.

Kujtojmë se, në takimin e sotëm është diskutuar për heqjen e barrierave për lëvizjen e lirë të mallrave, shërbimeve, kapitalit dhe njerëzve në të gjithë rajonin. Në takim morën pjesë përfaqësuesit e Bashkimit Evropian (BE), Bankës Evropiane për Rindërtim dhe Zhvillim (EBRD), Bankës Botërore dhe Bankës Evropiane të Investimeve, ndërkaq takimi i radhës parashikohet të zhvillohet në Durrës më 21 Dhjetor.

?Heqja përfundimtare e barrierave brenda rajonit tonë është urgjentisht e nevojshme. Në verë në Samitin e Poznanit, RCC inicioi idenë për një marrëveshje rajonale të udhëtimit me karta identiteti në rajon, ndaj mirëpresim të gjitha nismat e agjendave reale të liberalizimit për rajonin tonë, qofshin ato në lidhje me transportin dhe lehtësimin e tregtisë, lëvizshmërinë, dixhitalizimin ose fusha të tjera, pasi nuk ka vend për proteksionizëm. RCC është e gatshme të lehtësojë dhe intensifikojë punën për zbatimin e Planit Shumëvjecar të Veprimit për Zonën Rajonale Ekonomike (MAP REA) dhe më gjerë, besimplotë se do të arrihet një kornizë gjithëpërfshirëse.

Ne jemi në pritje që ky proces të paraqesë vizionin dhe të nxisë nisma dinamike për përmirësimin dhe forcimin e pronësisë së MAP REA të ri të përditësuar, si dhe për të ardhmen e Procesit të Berlinit. Kjo iniciativë gjithashtu ka potencialin për të kontribuar në propozimet për metodologjinë e re të anëtarësimit në BE dhe ky vendim duhet të merret me të gjashtë ekonomitë e Ballkanit Perëndimor (BP) në bord, por gjithashtu të thërrasë rreth tryezës Sekretariatin e Komunitetit të Transportit dhe të CEFTA-s “, përfundoi Bregu./CNA.al