Përfundon afati/ Ndërpritet sinjali analog, nisin transmetimet dixhitale

1 Tetor 2019, 07:44, Sociale CNA

Duke filluar nga dita e sotme, janë mbyllur transmetimet analoge në Tiranë dhe Durrës ndërkohë që për qarkun Vlorë, ato do të vazhdojnë deri në njoftim të dytë.

Në mbledhjen e zhvilluar ditën e djeshme Bordi i Autoritetit të Mediave Audiovizive vendosi të ndërpresë tranmetimet analoge në Tiranë dhe Durrës, pasi u njoh me masat e marra gjatë kësaj periudhe për administrimin e procesit.

Tashmë qytetarët nuk kanë më asnjë të drejtë për të parë kanalet televizive analoge, ndërsa ky proces është zhvilluar më parë në qarqet e Fierit, Beratit dhe Korçës dhe do të vijojë edhe në qaqet e tjera.

Njoftimi i plotë i AMA-s:

Autoriteti i Mediave Audiovizive (AMA), në mbledhjen e tij të zhvilluar më datë 30 shtator 2019, vendosi mbylljen e transmetimeve analoge në qarqet Tiranë dhe Durrës, në 01 tetor 2019, si dhe shtyrjen e afatit të kalimit në transmetimet numerike për qarkun Vlorë, deri në një datë të dytë që do të përcaktohet në vijim nga AMA.

Bordi u njoh me masat e marra nga AMA gjatë kësaj periudhe për administrimin e procesit të kalimit në transmetimet numerike. Lidhur me pajisjen e popullatës me dekodera, nga të dhënat dhe informacionet e depozituara nga operatorë të ndryshëm tregtarë, ka rezultuar se në treg ka numër mëse të mjaftueshëm dekoderash, që plotësojnë nevojat dhe kërkesat e qytetarëve. Kujtojmë se qeveria në kuadër të këtij procesi ka shpërndarë 88 mijë dekodera falas për familjet që janë pjesë e skemës së ndihmës ekonomike.

AMA gjatë vitit të fundit ka intensifikuar dhe diversifikuar fushatën e informimit të publikut duke e përcjellë atë nëpërmjet mediumeve të ndryshme informative.

Me kalimin në transmetimet numerike, shikuesit kanë mundësi të ndjekin 38 kanale pa pagesë të cilat mund të shikohen nga të gjithë dekoderat e tipit DVB-T2, më shumë se në çdo vend tjetër të Ballkanit. Mbulimi me sinjal numerik i territorit dhe cilësia e transmetimit përmes teknologjisë digjitale janë shumë herë më të larta krahasuar me teknologjinë analoge.

AMA, pavarësisht se pjesa më e madhe e qytetarëve tashmë janë të pajisur me dekodera, fton qytetarët që nuk janë pajisur ende me këtë pajisje, të marrin masa për të mundësuar aksesin në transmetimet televizive numerike.